Asia Cup 2025 मध्ये शानदार कामगिरी करणारा हार्दिक पंड्या पुन्हा एकदा त्याच्या वैयक्तिक आयुष्यामुळे चर्चेत आला आहे. पंड्याच्या आयुष्यामध्ये नव्या मुलीची एन्ट्री झाल्याचे म्हटले जात आहे. नताशा स्टँकोव्हिचसोबत घटस्फोट घेतल्यानंतर हार्दिकचे नाव जास्मिन वालियाशी जोडण्यात आले. त्यांचे नाते संपुष्टात आल्यानंतर आता पंड्या अभिनेत्री, मॉडेल महिका शर्माच्या प्रेमात पडल्याची चर्चा रंगली आहे.

कोण आहे महिका शर्मा?

महिका शर्मा ही एक मॉडेल आहे, ती भारतीय फॅशन क्षेत्रामध्ये तिची ओळख निर्माण करत आहे. मॉडेलिंग क्षेत्रात प्रवेश करण्यापूर्वी तिने इकोनॉमिक्स अँड फायनान्स या विषयात पदवी प्राप्त केली. अनेक म्युझिक व्हिडीओंमध्ये महिका शर्मा झळकली आहे. तिने मनीष मल्होत्रा, अनिता डोंगरे, तरुण ताहिलियानी यांसारख्या प्रख्यात फॅशन डिझायनर्ससोबत काम केले आहे. २०२४ मध्ये इंडियन फॅशन अवॉर्ड्समध्ये तिला ‘मॉडेल ऑफ द इयर’ हा पुरस्कार मिळाला होता.

गुजरात, दिल्ली अशा ठिकाणी स्थानिक स्पर्धांमधून महिका शर्माने तिच्या मॉडेलिंग करिअरची सुरुवात केली. तिला फिटनेसचीदेखील आवड आहेत. तिने योगा टीचर ट्रेनिंग देखील पूर्ण केले आहे. मॉडेलिंग क्षेत्रात काम करत असताना तिने जाहिरात क्षेत्रामध्येही पदार्पण केले आहे. अनेक जाहिरातींमध्ये महिका शर्मा झळकली आहे.

जानेवारी २०२० मध्ये हार्दिक पंड्या आणि नताशा स्टँकोव्हिच यांनी लग्न केले होते. त्यानंतर जुलै २०२४ मध्ये दोघांचा घटस्फोट घेण्याचा निर्णय घेतला. त्यानंतर हार्दिक ब्रिटीश गायिका जास्मिन वालियासोबत दिसला होता. ते दोघे डेट करत असल्याची चर्चा रंगली होती. आता जास्मिननंतर महिका शर्माशी हार्दिक पंड्याचे नाव जोडले जात आहे.