कोलकाता नाईट रायडर्स आणि रॉयल चॅलेंजर्स बंगळुरू या दोन्ही संघांमध्ये रोमांचक सामना पार पडला. कोलकाता नाईट रायडर्स संघाने शेवटच्या चेंडूवर रनआऊट करत रॉयल चॅलेंजर्स बंगळुरू संघावर १ धावेने विजय मिळवला. या सामन्यादरम्यान विराटची विकेट चर्चेचा विषय ठरली. दरम्यान हा सामना झाल्यानंतर कोलकाता नाईट रायडर्स संघाचा मेंटॉर गौतम गंभीरचा एक व्हिडिओ सध्या सोशल मीडियावर तुफान व्हायरल होऊ लागला आहे.

व्हायरल होत असलेल्या व्हिडिओमध्ये तुम्ही पाहू शकता की, गौतम गंभीर चौथ्या अंपायरसोबत चर्चा करताना दिसून येत आहे. ही घटना रॉयल चॅलेंजर्स बंगळुरू संघाची फलंदाजी सुरू असताना १८ -१९ व्या षटकादरम्यान घडली. या डावातील १९ वे षटक सुरू होण्यापूर्वी गौतम गंभीर अंपायरसोबत चर्चा करताना दिसून आला. सोशल मीडियावर असं म्हटलं जातंय की, विराटला बाद घोषित करण्यावरून गंभीर अंपायरसोबत चर्चा करतोय. मात्र असं काहीच नसून, प्रकरण वेगळंच आहे.

तर झाले असे की, रॉयल चॅलेंजर्स बंगळुरू संघाची फलंदाजी सुरू असताना १८ व्या षटकानंतर कोलकाता नाईट रायडर्सला सुनील नरेनला बाहेर बोलवायचं होतं. त्याच्याऐवजी अनुकूल रॉयला मैदानात उतरवण्याचा कोलकाताचा प्लान होता. मात्र अंपायरने त्याला मैदानाबाहेर जाऊ दिलं नाही.

कोलकाता नाईट रायडर्सने केलेली ही मागणी अंपायरने फेटाळून लावली. त्यामुळे सुनील नरेनला पुन्हा एकदा मैदानात उतरावं लागलं. कोलकाता नाईट रायडर्स संघाचे कोच चंद्रकांत पंडित आणि गौतम गंभीर हे भडकल्याचं दिसून आलं. या सामन्यात प्रथम फलंदाजी करताना कोलकाता नाईट रायडर्स संघाने २० षटकअखेर २२२ धावा केल्या. या धावांचा पाठलाग करताना रॉयल चॅलेंजर्स बंगळुरू संघाने २२१ धावा केल्या. रॉयल चॅलेंजर्स बंगळुरू संघ विजयापासून केवळ १ धाव दूर राहिला.