भारत आणि न्यूझीलंड या दोन्ही संघांमध्ये ३ कसोटी सामन्यांची मालिका पार पडली. या मालिकेतील तिसऱ्या सामन्यातही भारतीय संघाला पराभवाचा सामना करावा लागला आहे. यासह भारताने मायदेशात खेळताना पहिल्यांदाच ३-० ने कसोटी मालिका गमावली आहे.

भारतीय संघाने नेमकी काय चूक केली? कोणत्या चुका भारतीय संघाला महागात पडल्या? मास्टर ब्लास्टर सचिन तेंडुलकरने याबाबत आपली प्रतिक्रिया दिली आहे. यासह त्याने शुभमन गिलचं कौतुक केलं आहे.

सचिन तेंडुलकरने एक्स अकाऊंटवर एक पोस्ट शेअर केली आहे. या पोस्टमध्ये तो म्हणाला, ' मायदेशात खेळताना ३-० ने पराभूत होणं हे पचवणं खूप कठीण आहे. शॉट सिलेक्शन चुकीचं होतं? की सामन्यासाठी तुम्हीच तयारच नव्हते. शुभमन गिलने पहिल्या डावात चांगली फलंदाजी केली. रिषभ पंतने दोन्ही डावात चांगली फलंदाजी केली. या आव्हानात्मक खेळपट्टीवर त्याचा फुटवर्क शानदार होता.

न्यूझीलंडविरुद्ध झालेला विजय हा भारतीयांसाठी न पचवणारा आहे. सचिन तेंडुलकरही या पराभवामुळे नाराज आहे. त्याने न्यूझीलंडच्या खेळाडूंना या शानदार विजयाचं श्रेय दिलं आहे. या मालिकेतील पहिला सामना बंगळुरूतील एम चिन्नास्वामी स्टेडियमवर पार पडला होता.

या सामन्यात भारतीय संघाला ८ गडी राखून पराभवाचा सामना करावा लागला होता. तर मालिकेतील दुसरा सामना भारताने ११३ धावांनी गमावला होता. आता मुंबईत पार पडलेल्या तिसऱ्या सामन्यात भारतीय संघाला २५ धावांनी पराभवाचा सामना करावा लागला आहे.

भारतीय संघाकडून फलंदाजी करताना विराट कोहली आणि रोहित शर्मा हे पूर्णपणे फ्लॉप ठरले. भारताकडून फलंदाजी करताना रिषभ पंतने सर्वाधिक २६१ धावा केल्या. यादरम्यान त्याने ३० चौकार आणि ८ षटकार खेचले. यासह १९० धावा करणारा यशस्वी जयस्वाल या मालिकेत दुसरा सर्वाधिक धावा करणारा फलंदाज ठरला. यशस्वीने आपल्या खेळीदरम्यान २४ चौकार आणि ३ षटकार खेचले.