भारतीय संघातील अनुभवी फलंदाज विराट कोहलीने( Virat Kohli) टी-२० वर्ल्डकप (ICC T20 World Cup 2024) जिंकून देण्यात मोलाची भूमिका बजावली. सध्या विराट कोहली लंडनमध्ये आपल्या कुटुंबासोबत वेळ घालवतोय. दरम्यान बंगळुरुतील त्याच्या मालकीच्या पबवर पोलीसांनी कारवाई केली आहे. बंगळुरुतील एमजी रोडवर असलेलं वन८ कम्युन (One 8 commune) हे पब रात्री उशिरापर्यंत सुरु होतं. त्यामुळे पोलीसांनी पब मॅनेजमेंटविरोधात एफआयआर दाखल केला आहे.

मिळालेल्या माहितीनुसार, बंगळुरुतील एमजी रोडवर विराट कोहलीच्या मालकीचं वन ८ कम्युन हे पब आहे. वन ८ कम्युनसह इतर पब हे रात्री उशिरापर्यंत सुरु होते. त्यामुळे पोलीस अॅक्शनमध्ये आले कारवाई करत पब मॅनेजमेंटवर कारवाईचा बडगा उगारला आहे. रात्री उशिरापर्यंत पब सुरु ठेवण्यासह या पबवर आणखी काही आरोप करण्यात आले आहेत. डीसीपी सेंट्रलने एका निवेदनात सांगितले की, ' आमच्याकडे, या पबमध्ये रात्री उशिरापर्यंत मोठ मोठ्या आवाजात गाणी वाजवत असल्याच्या तक्रारीही आल्या आहेत. (Virat Kohli News In Marathi)

विराट कोहलीच्या मालकीचं हे पब बंगळुरुतील एम चिन्नास्वामी स्टेडियमजवळ आहे. रात्री १ वाजेपर्यंत पब सुरु ठेवण्याची परवानगी आहे, असं पोलीसांनी सांगितलं. मात्र ६ जुलै रोजी, वन ८ कम्युन हे पब ठरेलल्या वेळेपेक्षाही जास्त वेळ सुरु होतं. त्यामुळे पब मॅनेजमेंटवर कारवाई करण्यात आली आहे