मुंबई: क्रिकेट विश्वातून मोठी बातमी समोर येत आहे. इंग्लंडला वनडे वर्ल्डकप २०१९ जिंकून देणारा कर्णधार इयॉन मॉर्गन या आठवड्यात मोठी घोषणा करू शकतो. रिपोर्ट्सनुसार, आंतरराष्ट्रीय क्रिकेटला तो रामराम करणार असल्याचे कळते. क्रिकेटमधून संन्यास घेण्याच्या तो विचारात आहे. २०१९ वर्ल्डकप स्पर्धेनंतर त्याचा फॉर्म हरवलेला आहे. त्याच्या बॅटमधून हव्या तशा धावा निघालेल्या नाहीत. (England captain Eoin Morgan Likely To retirement from international cricket soon Says Reports)

बॅटमधून धावा निघत नसल्याने इयॉन मॉर्गन (Eoin Morgan) टीकाकारांच्या निशाण्यावर आहे. त्याच्यावर टीकेची झोड उठवली जात आहे. जर मॉर्गनने निवृत्ती जाहीर केली तर, त्याची जागा जोस बटलर घेऊ शकतो.

एका रिपोर्टनुसार, कर्णधार म्हणून आपल्या कारकीर्दीत मर्यादित षटकांच्या क्रिकेट प्रकारात खेळाचं स्वरूप बदलण्याचे श्रेय मॉर्गनला दिलं जातं. मात्र, २०१९ वर्ल्डकप जिंकल्यानंतर (Cricket World Cup) त्यानं मर्यादित षटकांच्या क्रिकेटमध्ये केवळ एकच शतक केलं आहे. नेदरलँडविरोधात खेळल्या गेलेल्या दोन वनडे मॅचमध्ये तो सपशेल अपयशी ठरला होता.

दुसरीकडे, बटलर आयपीएल २०२२ (IPL 2022) मध्ये सर्वाधिक धावा करणारा खेळाडू ठरला आहे. राजस्थान रॉयल्सकडून आयपीएल २०२२ मध्ये खेळताना बटलरने ऑरेंज कॅप मिळवली होती. त्याने अलीकडेच नेदरलँडविरोधात केवळ ७० चेंडूंमध्ये नाबाद १६२ धावा कुटल्या होत्या.

रिपोर्ट्सनुसार, मॉर्गनने एक किंवा दोन क्रिकेट प्रकारांसाठी आपला वेळ द्यायला हवा का, असा प्रश्न विचारला जात आहे. अशात आता बटलरकडे कर्णधारपदाची जबाबदारी द्यायला हवी, असा एक मतप्रवाह आहे. बटलरने उपकर्णधार म्हणून जबाबदारी सांभाळली आहे.

इंग्लंडने न्यूझीलंडला पराभूत करून वनडे वर्ल्डकप जिंकला आहे. त्यानंतर मॉर्गनला हवी तशी कामगिरी करता आलेली नाही. त्याला फलंदाजीत लय सापडलेली नाही. त्याने ऑगस्ट २०२० पासून मर्यादित षटकांच्या क्रिकेट प्रकारात एकूण २६ इनिंगमध्ये केवळ एक अर्धशतकी खेळी केली आहे. २०१९ वर्ल्डकप स्पर्धा जिंकल्यानंतर त्याने केवळ आयर्लंडविरुद्ध एक शतक केलं आहे.

Edited By - Nandkumar Joshi