दिल्लीच्या अरुण जेटली स्टेडियममध्ये काल दिल्ली कॅपिटल्स विरुद्ध मुंबई इंडियन्स हा सामना रंगला. अटीतटीच्या सामन्यात शेवटपर्यंत मुंबई जिंकेल की दिल्ली हे सांगणे अशक्य होते. सलग तीन रनआउट्सच्या जोरावर कालचा सामना मुंबईने जिंकला आणि अपराजित दिल्लीला त्यांच्याच घरात पछाडले. विजयासह मुंबईने पॉईंट्स टेबलवर मोठी झेप घेतली.

दिल्ली-मुंबई सामन्यादरम्यान करुण नायरने कमबॅक केले. इम्पॅक्ट प्लेयर म्हणून आलेल्या करुण नायरने २२२.५० च्या स्ट्राईक रेटने ४० बॉल्समध्ये ८९ धावा केल्या. मुंबईचा हुकमी इक्का असलेल्या जसप्रीत बुमराहची त्याने धुलाई केली. सामन्यादरम्यान करुण नायर आणि जसप्रीत बुमराह यांच्यात गरमागरमी झाल्याचेदेखील पाहायला मिळाले.

करुण नायर- जसप्रीत बुमराह यांच्या राड्याव्यतिरिक्त कालच्या सामन्यातील आणखी एका राड्याची चर्चा पाहायला मिळत आहे. अरुण जेटली स्टेडियममध्ये सामना पाहायला आलेल्या प्रेक्षकांमध्ये हाणामारी झाली. एक महिला आणि पुरुष यांच्यात तुफान मारामारी झाली. भांडण सोडवण्यासाठी मध्यस्थी करायला आलेल्या लोकांमुळे वाद चिघळला. सुरक्षारक्षक आल्यानंतर मारामारी थांबली. ही संपूर्ण घटना कॅमेऱ्यामध्ये कैद झाली. या घटनेचा व्हिडीओ व्हायरल होत असून मारामारीचे कारण अद्याप अस्पष्ट आहे. व्हिडीओ पाहून एका चाहत्याने 'तिकीट का पैसा वसूल!' अशी कमेंट केली आहे.

आयपीएल २०२५ मध्ये कालच्या सामन्यानंतर मुंबई इंडियन्स पुन्हा फॉर्ममध्ये आल्याचे म्हटले जात आहे. दिल्ली विरुद्ध मुंबई महामुकाबल्यामध्ये मुंबईचा सांघिक खेळ पाहायला मिळाला. हा आयपीएलमधला मुंबईचा दुसरा विजय असला तरीही, या विजयामुळे पॉईंट्स टेबलवर नवव्या क्रमावरुन उडी मारुन मुंबईचा संघ सातव्या स्थानावर पोहोचला आहे.