Retirement News : वेस्ट इंडिजचा अष्टपैलू खेळाडू आंद्रे रसेलने आंतरराष्ट्रीय क्रिकेटमधून निवृत्तीची घोषणा केली आहे. जमैकामधील सबिना पार्क येथील स्टेडिमयवर खेळल्या जाणाऱ्या ऑस्ट्रेलिया विरुद्धच्या पहिल्या दोन टी-२० सामन्यांनंतर रसेल आंतरराष्ट्रीय क्रिकेटमधून निवृत्त होणार आहे. २०२६ टी-२० विश्वचषकापूर्वी वेस्ट इंडियन संघाला मोठा धक्का बसला आहे.

३७ वर्षीय आंद्रे रसेल २०१९ पासून आंतरराष्ट्रीय क्रिकेटमध्ये सक्रीय आहे. त्याने टी-२० फॉरमॅटमध्ये ८४ सामने खेळले आहेत. वेस्ट इंडिजसाठी त्याने एक कसोटी सामना तर ५६ वनडे सामने खेळले आहेत. पण मागील ६ वर्षांपासून रसेल फक्त टी-२० फॉरमॅटमध्ये त्याच्या संघासाठी सक्रीय होता. जमैकामध्ये २० जुलै रोजी पहिला आणि २२ जुलै रोजी दुसरा सामना खेळला जाईल. त्यानंतर आंद्रे रसेल आंतरराष्ट्रीय क्रिकेटमधून निवृत्त होणार आहे.

'वेस्ट इंडिज क्रिकेट संघाचे प्रतिनिधित्त्व करणे हे माझ्या आयुष्यातील सर्वात अभिमानास्पद कामगिरींपैकी एक आहे. मी या ठिकाणी पोहोचेन असे मला कधीच वाटले नव्हते. पण जेव्हा तुम्ही खेळायला सुरुवात करता आणि खेळाच्या प्रेमात पडता, तेव्हा तुम्ही काय साध्य करु शकता हे तुम्हाला समजते. मला वेस्ट इंडिजकडून खेळून माझी छाप पाडायची होती. तसा मी प्रयत्न केला', असे आंद्रे रसेलने म्हटले आहे.

आंद्रे रसेल म्हणाला, 'मला वेस्ट इंडिजसाठी खेळायला आवडते. मला माझी प्रतिभा दाखवण्याची संधी मिळाली. माझ्या आंतरराष्ट्रीय कारकीर्दीचा शेवट मला उत्तम पद्धतीने करायचा आहे. कॅरेबियन देशांमधून येणाऱ्या प्रत्येक क्रिकेटपटूसाठी आदर्श बनायचे आहे'. आंद्रे रसेलने ८४ सामन्यांपैकी ७३ डावांमध्ये एकूण १०७८ धावा केल्या आहेत. त्याची सरासरी २२ आणि स्ट्राइक रेट १६३.०९ आहे. गोलंदाज म्हणून त्याने टी-२० फॉरमॅटमध्ये ६१ विकेट्स घेतल्या आहेत.