नवी दिल्ली : अखिल भारतीय फुटबॉल (football) महासंघाचे सचिव कुशल दास (AIFF general secretary Kushal Das) वैद्यकीय कारणास्तव पदाचा राजीनामा दिला आहे. दास यांचा बारा वर्षांचा कार्यकाल संपुष्टात आला आहे. दास यांच्यावर आर्थिक अनियमिततेचे सातत्याने आरोप केले जात हाेते. दरम्यान महासंघाच्या दैनंदिन कारभाराची जबाबदारी प्रभारी सरचिटणीस सुनंदो धर यांच्याकडे साेपविण्यात आली आहे. (kushal das latest marathi news)

सन 2010 मध्ये पदभार स्वीकारलेल्या दास हे प्रकृतीच्या कारणास्तव दहा दिवसांपासून (ता.20 जून) रजेवर होते. दरम्यान फुटबॉल जगतातील तज्ञांच्या म्हणण्यानूसार प्रशासक समितीने त्यांना कामकाजापासून दूर ठेवले हाेते.

नाव न सांगण्याच्या अटीवर पीटीआयशी बाेलताना एका उच्चपदस्थ अधिका-याने दास यांनी आरोग्याच्या कारणांमुळे राजीनामा दिल्याचे म्हटले. दास यांच्यावर यापूर्वी एआयएफएफच्या एका महिला कर्मचाऱ्याने विनयभंगाचा आरोप केला होता. अंतर्गत तक्रार समितीने ते निर्दाेष असल्याचा निकाल दिला. त्यानंतर संस्थेला टीकेला सामोरे जावे लागले.

एएफसी आशियाई करंडक स्पर्धेत पात्रता फेरीतील वरिष्ठ पुरुष राष्ट्रीय संघाचे (india) भविष्य सांगण्यासाठी ज्योतिष कंपनीला 16 लाखांहून अधिक पैसे दिले गेले अशीही चर्चा रंगली हाेती. दरम्यान सन 2010 मध्ये AIFF मध्ये सामील होण्यापूर्वी, दास यांनी दोन वर्षे आंतरराष्ट्रीय क्रिकेट परिषद (ICC) चे मुख्य वित्तीय अधिकारी (CFO) म्हणून काम केले.

दास यांच्या कार्यकाळात भारतीय संघ आशियाई करंडक फुटबॉल स्पर्धेसाठी तीनदा पात्र ठरला, परंतु वरिष्ठ संघासाठी आंतरराष्ट्रीय स्तरावरील सामने आयोजित करू न शकल्याने दास यांना टीकेचा सामना करावा लागला हाेता. अखिल भारतीय फुटबॉल महासंघाने दास यांच्या याेगदानाबद्दल त्यांचे ट्विट करुन आभार मानले आहेत.

Edited By : Siddharth Latkar