ग्रेटर नोएडामधून एका महिला अत्याचाराची घटना समोर आली आहे. लग्नाचे आमिष दाखवून एका सहकर्मचाऱ्याने महिलेवर बलात्कार केला आहे. आरोपी हा आधीपासून विवाहित असून, त्याने ही बाब लपवली, तसेच पीडितेसोबत शारीरिक संबंध ठेवले होते. या घटनेची माहिती पोलिसांना मिळाल्यानंतर आरोपीला तातडीने अटक करण्यात आली असून, त्याच्याविरोधात गुन्हा दाखल करण्यात आला आहे.

शुक्रवारी एका पोलिस अधिकाऱ्याने सांगितले की, आरोपीचे नाव मोनू आहे. तो आणि पीडित महिला एका कारखान्यात एकत्र काम करत होते. या काळात त्यांची मैत्री झाली. मैत्री हळूहळू प्रेमात बदलली. यानंतर आरोपीने महिलेला लग्नाचे आमिष दाखवून तिच्याशी शारीरिक संबंध ठेवण्यास सुरुवात केली.

दरम्यान, पीडितेला आरोपी मोनू आधीच विवाहित असल्याचे समजले. तसेच त्याला २ अपत्य असल्याची माहिती मिळाली. त्यानंतर महिलेने मोनूसोबत संबंध तोडले. मात्र, तरीही आरोपी बदनाम करण्याची धमकी देऊ लागला. यामुळे पीडित महिला आणि मोनूमधील वाद वाढला.

कसना पोलिस स्टेशनचे प्रभारी धर्मेंद्र कुमार शुक्ला म्हणाले की, पीडितेने आरोपीविरोधात तक्रार दाखल केली. पीडितेच्या तक्रारीच्या आधारे आरोपी मोनूविरुद्ध बीएनएसच्या संबंधित कलमांखाली गुन्हा दाखल करण्यात आला आहे. गुरुवारी त्याला अटक करण्यात आली. तसेच त्याला १४ दिवसांची न्यायालयीन कोठडी सुनावण्यात आली आहे.