पश्चिम बंगालमध्ये भाजप सत्तेवर आलेला असूनही वकिलांच्या संघटनेच्या निवडणुकीत पक्षाला केवळ तीन जागा मिळाल्या. हे निकाल विधानसभा निवडणुकीच्या निकालांच्या अगदी उलट आहेत. त्यावरून कायदेतज्ज्ञांच्या वर्गातील काही घटकांमध्ये टीएमसीचा (TMC) प्रभाव अजूनही कायम असल्याचे दिसून येत आहे. विजयी ठरलेल्या तृणमूल उमेदवारांना माजी मुख्यमंत्री ममता बॅनर्जी यांच्या शिफारशीवरून उमेदवारी देण्यात आली होती. त्यावरून ममता बॅनर्जी यांचा करिष्मा अजूनही राज्यात असल्याची चर्चा सुरू झालीय. त्याचमुळे भाजपची धडधड वाढलीय.

दरम्यान या निकालांमुळे तृणमूल काँग्रेसच्या (TMC) गोटात आनंदाचे वातावरण आहे. यात तृणमूलच्या वकील आघाडीचे सुभाषिस चक्रवर्ती हे सर्वाधिक मतांच्या फरकाने विजयी झालेले उमेदवार ठरले. तृणमूलच्या इतर प्रमुख विजयी उमेदवारांमध्ये बैसानोर चॅटर्जी, अन्सार मंडल, अशोक देब, इंद्रनील बसू आणि सिद्धार्थ मुखर्जी यांचा समावेश होता.

सर्वोच्च न्यायालयाच्या निर्देशानुसार 'बार कौन्सिल ऑफ इंडिया' महिला उमेदवारांमधून दोन अतिरिक्त महिला सदस्यांना नामनिर्देशित करेल. या नामनिर्देशनांमुळे 'पश्चिम बंगाल बार कौन्सिल'ची एकूण सदस्यसंख्या २५ होईल. एकूण ७५ उमेदवार या निवडणुकीच्या रिंगणात उतरले होते. यात टीएमसीचे २३, भाजपचे २२ आणि डाव्या पक्षाने १२ तर १८ अपक्ष उमेदवार निवडणुकींच्या मैदानात उतरले होते.

या बार कौन्सिल ऑफ इंडियाच्या निवडणुकीत भाजपनं आपल्या पहिल्या तीन जागा कायम राखल्या आहेत. तर काँग्रेसनं दोन जागा जिंकल्या आहेत. दुसरीकडे डाव्या आघाडीचं संख्याबळ दिवसेंदिवस कमी होताना दिसत आहे. मागील निवडणुकीतील चार जागांवरून ते कमी होत यावेळी फक्त तीन जागांवर जिंकलेत.