पश्चिम बंगालमधील मालदा जिल्ह्यातून धक्कादायक प्रकरण समोर आलं आहे.सरकारी मालदा मेडिकल कॉलेज हॉस्पिटलमधील एका ज्युनियर डॉक्टरला त्याच्या २४ वर्षीय पत्नीचा (MBBS विद्यार्थीनी) गूढ परिस्थितीत मृत्यू झाल्यानंतर अटक करण्याात आली आहे. मृत तरूणीच्या कुटुंबियांनी डॉक्टरवर गंभीर आरोप केले असून, पोलिसांनी तपासानंतर संशयित आरोपीला ताब्यात घेतले आहे.

उज्ज्वल सोरेन असे ज्युनियर डॉक्टर, संशयित आरोपीचे नाव आहे. पोलिसांनी त्याला मालदा जिल्हा न्यायालयात हजर करण्यात आले. न्यायालयाने त्याला ७ दिवसांची पोलीस कोठडी सुनावली आहे, असे पोलीस सुत्रांकडून माहिती मिळाली आहे. एका वरिष्ठ पोलीस अधिकाऱ्यानं सांगितले की, उज्ज्वल सोरेन हा मूळचा बंगालमधील पुरूलिया जिल्ह्यातील रहिवासी आहे.

या घटनेची माहिती पोलिसांना मिळताच त्याच्या फोन लोकेशनवरून त्याचा शोध घेण्यात आला. सध्या पोलिसांकडून आरोपीची कसून चौकशी सुरू आहे. सरकारी मालदा मेडिकल कॉलेज हॉस्पिटलमधील ज्युनिअर डॉक्टर यांचे एमबीबीएस विद्यार्थिनीसोबत प्रेमसंबंध जुळले.

मृत तरूणीच्या आईनं दिलेल्या माहितीनुसार, रिलेशनमध्ये तरूणी ज्युनियर डॉक्टरकडून गर्भवती राहिली होती. एक वर्ष ते रिलेशनशिपमध्ये होते. यानंतर गर्भपात झाला. पीडित तरूणी आणि उज्ज्वलने मंदिरात जाऊन लग्न केले होते. परंतु तरूणीनं कोर्ट मॅरेजचा आग्रह धरला. तेव्हा उज्ज्वलने तिच्या आग्रहाला कानाडोळा केला.

प्राथमिक तपासात असे आढळून आले आहे की, एमबीबीएस विद्यार्थिनीच्या मृत्यूचे कारण ड्रग्ज ओव्हरडोज असू शकते. पोलीस पीडित तरूणीच्या शवविच्छेदनाच्या अहवालासाठी थांबले आहेत. यानंतर या अहवालातून पुढील तपास केला जाईल.

मृत पीडितेच्या आईनं उज्ज्वलवर गंभीर आरोप केले आहेत. 'गेल्या सोमवारी माझी मुलगी माहेरी आली होती. सोरेननं तिला भेटायला बोलावले. कदाचित त्यांच्यात भांडण झाले असावे. कदाचित तिला मारहाण करण्यात आली असावी. तिनं काहीतरी खाल्लेही असावे. त्यानंतर मुलीची प्रकृती गंभीर झाली. तिच्या तोंडातून फेस येत होता. रात्री तिचा रूग्णालयात उपचारादरम्यान मृत्यू झाला', असं पीडितेच्या आईनं म्हटलं आहे. सध्या या प्रकरणी पोलिसांनी संशयित आरोपीला ताब्यात घेतलं आहे. पोलिसांकडून पुढील तपास सुरू आहे.