Pune: घर ते मेट्रो स्थानक प्रवास होणार मोफत; शटल बससेवा सुरू, थांबे अन् कोणत्या वेळेत धावणार?

आता पुणेकरांचा प्रवास अधिक सुखकर होणार आहे. कारण कोथरूडमध्ये मेट्रो स्थानक ते घर प्रवास करणाऱ्यांना मोफत बससेवेचा लाभ मिळणार आहे. राज्याचे उच्च व तंत्रशिक्षण मंत्री चंद्रकांत पाटील यांच्या पुढाकारातून कोथरूडमध्ये मोफत शटल बससेवा सुरु करण्यात आली आहे. यामुळे नागरिकांना नक्कीच याचा फायदा होईल.

मेट्रो स्थानक ते घर हा प्रवास अधिक सुखकर व्हावा आणि सार्वजनिक वाहतुकीचा प्रसार व्हावा, या उद्देशानं मंत्री चंद्रकांत पाटील यांच्या पुढाकारानं नवीन शटल बससेवा सुरू करण्यात आली आहे. ही बससेवा कोथरूडमध्ये सुरू कऱण्यात आली आहे. या बससेवेचे लोकार्पण चंद्रकांत पाटील आणि पुणे मेट्रोचे व्यवस्थापकीय संचालक श्रावण हर्डीकर यांच्या उपस्थितीत करण्यात आले.

सोमवार ते शनिवार ही सेवा सुरू राहणार असून, नागरिकांच्या मागणीनुसार बसचे थांबे निश्चित करण्यात आले आहे. या सेवेमुळे कोथरूडकरांना आधुनिक, सुरक्षित आणि आरामदायी सार्वजनिक वाहतूक उपलब्ध होईल, असं पुणे मेट्रोचे व्यवस्थापकीय संचालक श्रावण हर्डीकर यांनी सांगितले.

पुणे आणि पिंपरी-चिंचवड शहरात मेट्रो सेवा सुरू झाल्यामुळे वेळ आणि पैशांमध्ये बचत होऊ लागली. घरापासून मेट्रोस्थानकापर्यंत ये-जा करण्यासाठी आवश्यक सुविधा उपलब्ध नसल्यामुळे अनेकजण या सुविधेकडे दुर्लक्ष करीत होते. त्यामुळे मेट्रोचा वापर अधिकाधिक व्हावा, सार्वजनिक वाहतुकीला प्राधान्य मिळावे आणि खासगी वाहने रस्त्यावर येऊ नये आणि वाहतूक कोंडी होऊ नये या उद्देशाने चंद्रकांत पाटील यांनी लोकसहभागातून मोफत शटल बससेवा सुरू केली आहे.

अशी असेल मोफत शटल बससेवा

राजाराम पूल-माळवे चौक, वनदेवी- कर्वेनगर, डहाणूकर- कर्वे पुतळा- करिश्मा चौक- एसएनडीटी मार्गावर रोज सकाळी ८.३० ते १ आणि सायंकाळी ४ ते ८ वेळेत सुरु असणार आहे.