मुंबईकरांचे मेगाहाल! पश्चिम, मध्य अन् हार्बर लोकलला लेटमार्क, रस्त्यावरही वाहतूककोंडी, मोनो रेल विस्कळीत

गणेश चतुर्दशीनंतर पावसानं जणू पुन्हा एकदा कमबॅक केलं आहे. राज्यातील विविध भागांमध्ये मुसळधार ते अतिमुसळधार पाऊस कोसळत आहे. मुंबईसह उपनगरांमध्ये गेल्या २ दिवसांपासून पाऊस बरसत आहे. संततधारेमुळे मुंबईच्या अनेक भागांमध्ये पाणी साचलं आहे. काल रात्रीपासून पाऊस बरसत असल्यामुळे लोकलसह मोनो रेलही विस्कळीत झाली आहे. याचा थेट फटका सामान्यांना बसत आहे

कामगारांना लेटमार्कचा फटका

मुसळधार पावसामुळे मध्ये रेल्वे १५ ते २० मिनिटे उशिराने धावत आहे. कामाच्या पहिल्याच दिवशी कामगारांना लेटमार्कचा फटका बसला आहे. रविवारी रात्री मुंबईतील अनेक भागांमध्ये मुसळधार पाऊस कोसळला. यामुळे मध्य रेल्वे १५ ते २० मिनिटे उशिरानं धावत आहे. याचा थेट फटका प्रवाशांना बसत आहे. रविवारच्या सुट्टीनंतर आज आठवड्याच्या पहिल्याच दिवशी, लोकल उशिराने धावत असल्यामुळे कामगारांना लेटमार्कचा फटका बसणार आहे.

माहीम, माटुंगा आणि दादर परिसर जलमय

मुंबईत रात्रीपासून सुरू असलेल्या पावसामुळे रेल्वे रूळांवर पाणी साचलंय. माहीम, माटुंगा आणि दादर परिसरातील रेल्वे रुळांवर पाणी साचलंय. यामुळे पश्चिम रेल्वे १५ मिनिटे उशिराने धावत असून, अनेक लोकल रद्द करण्यात आल्या आहेत. आठवड्याच्या पहिल्याच दिवशी कामावर जाणाऱ्या कामगारांना याचा थेट फटका बसला आहे.

हार्बर लाईनवरील लोकल १० मिनिटं उशिरा

हार्बर लाईनवरील लोकलही उशिरानं धावत आहे. पनवेलवरून छत्रपती शिवाजी महाराज टर्मिनसकडे जाणाऱ्या लोकल दहा मिनिटं उशिरानं धावत आहे. रिमझिम पावसामुळे खारघर रेल्वे स्टेशनच्या आजूबाजूला मोठ्या प्रमाणात पाणी साचलं आहे. त्यामुळे वाहन चालकांना पाण्यातून मार्ग काढत प्रवास करावा लागत आहे.

पूर्व द्रुतगती मार्गावर वाहतूक कोंडी

सतत पडणाऱ्या पावसामुळे पूर्व द्रुतगती मार्गावर मोठ्या प्रमाणात वाहतूक कोंडी निर्माण झाली आहे. आठवड्याचा पहिल्याच दिवशी नोकरदार वर्गाला ऑफिस गाठण्यासाठी नाहक त्रासाचा सामना करावा लागत आहे.

मनसे रस्त्यावर उतरणार

ठाण्यातील तीन हात नका ते मुलुंड टोल नाकामध्ये वाहतूक कोंडी निर्माण झाली आहे. याचा थेट फटक वाहनधारकांना बसला आहे. गेल्या अर्धा ते पाऊण तासापासून वाहने संथगतीने पुढे सरकत आहेत. खड्डे ,अर्धवट सुरू असलेली कामे आणि सिग्नल यंत्रणेमुळे रस्त्यावर मोठ्या प्रमाणात वाहतूक कोंडी निर्माण झाली आहे. याच वाहतूक कोंडीचा प्रश्न घेऊन मनसे आज मुंबईच्या रस्त्यावर उतरणार आहे.