उत्तर प्रदेशातील बाराबंकी येथून एक धक्कादायक घटना उघडकीस आली आहे. एका ढोंगी डॉक्टरच्या निष्काळजीपणामुळे एका महिलेचा मृत्यू झाला आहे. मिळालेल्या माहितीनुसार, या डॉक्टरनं महिलेची शस्त्रीक्रिया युट्यूब पाहून केले आहे. तसेच डॉक्टर नशेत असल्याची माहिती आहे. त्यानं नशेत महिलेची आतडे, नसा तसेच अन्ननलिका कापली. या घटनेनंतर पोलिसांनी या प्रकरणात लक्ष घातलं. तसेच आरोपीचा शोध घेण्यास पथके तयार केली. सध्या फरार आरोपीचा शोध सुरू आहे.

ही घटना कोठी पोलीस स्टेशन परिसरातील डफरापूर मजरा सैदनपूर येथील आहे. फतेह बहादूर यांनी सांगितले की, ५ डिसेंबर रोजी दुपारी पत्नी मुनिष्रा रावत हिच्या पोटात तीव्र वेदना झाल्या. फतेह यांनी त्यांच्या पत्नीला श्री दामोदर रूग्णालयात नेले. हा दवाखाना ज्ञान मिश्रा आणि विवेक मिश्रा चालवत असल्याची माहिती आहे. तपासणीदरम्यान, ज्ञान प्रकाश यांनी मुनिष्राला किडनी स्टोन असल्याचं सांगितलं.

उपचारासाठी २५ हजार रूपये लागतील, असं त्याने सांगितलं. मात्र, दोघांमध्ये २० हजार रूपयांत करार झाला. पैसे मिळाल्यानंतर ज्ञान प्रकाशने युट्यूब पाहून महिलेची शस्त्रक्रिया केली, असा आरोप आहे. मुनिष्राच्या पोटात चिरे पाडून लहान आतडे, नसा कापून टाकल्या. ऑपरेशननंतर महिलेला प्रचंड वेदना राहिल्या. दुसऱ्या दिवशी रूग्णालयातच महिलेचा दुर्देवी मृत्यू झाला.

महिलेचा मृत्यू होताच ज्ञान प्रकाशने आपल्याला कुटुंबासोबत पळ काढला. ९ डिसेंबर रोजी फतेह यांनी पोलीस ठाण्यात धाव घेऊन ज्ञान प्रकाश आणि विवेक मिश्राविरोधात तक्रार दाखल केली. पोलिसांनी विविध कायद्यांतर्गत गुन्हा दाखल केला. दरम्यान, फतेह यांनी रूग्णालय बनावट असून, आरोपींकडे कोणतीही वैद्यकीय पदवी नसल्याचा दावा केला आहे.

या घटनेनंतर पोलिसांनी बेकायदेशीर रूग्णालयाला भेट देऊन नोटीस बजावली. तसेच या नोटीशीला एका आठवड्यात उत्तर देण्यास सांगितले. दरम्यान, आरोपींचा शोध घेण्यासाठी पोलिसांनी पथके तयार केली असून, पुढील तपास सुरूये.