Summary -

• भाजप नेत्याकडून बायकोची निर्घृण हत्या

• किचनमध्ये चाकूने सपासप वार

• पत्नी खासगी शाळेत शिक्षिका होती

• अनैतिक संबंधाच्या संशयावरून हत्या

• आरोपी पतीसह आई-वडिलांना अटक

उत्तर प्रदेशमध्ये भाजप नेत्याने बायकोची निर्घृण हत्या केल्याची धक्कादायक घटना समोर आली. आंबेडकरनगरमध्ये राहणाऱ्या भाजप नेत्याने चाकूने बायकोचा गळा चिरून हत्या केली. घरातील किचनमध्ये रक्ताच्या थारोळ्यात महिलेचा मृतदेह आढळून आला. भाजप नेत्याची बायको शाळेत शिक्षिका होती. या घटनेमुळे उत्तर प्रदेशमध्ये खळबळ उडाली आहे. पोलिसांनी या प्रकरणी तिघांविरोधात गुन्हा दाखल करत त्यांना अटक केली.

घटनेची माहिती मिळताच पोलिसांनी घटनास्थळी धाव घेतली. महिलेचा मृतदेह ताब्यात घेत शवविच्छेदनासाठी रुग्णालयात पाठवला. पोलिसांनी आरोपी भाजप नेता उमाशंकर सिंहला अटक केली. त्याची चौकशी केली जात आहे. अनैतिक संबंधाच्या संशयावरून त्याने हे भयंकर कृत्य केले. या प्रकरणी भाजप नेत्यासह त्याच्या आई-वडिलांना देखील पोलिसांनी अटक केली.

भाजप नेता बायकोच्या चारित्र्यावर संशय घ्यायचा. तिचे अनैतिक संबंध असल्याचे त्याला वाटायचे. तसंच तो दोन्ही मुलं आपली नसल्याचे म्हणायचा. आरोपी उमाशंकर हा भाजपचा शहर मीडिया प्रभारी आहे. तो जेसीबी मशीन देखील चालवतो. त्याची बायको सोनी खासगी शाळेत शिक्षिका होती. उमाशंकर आणि सोनी यांना दोन मुलं आहेत.

सोमवारी सकाळी १० वाजता सोनी यांनी मुलांना शाळेत पाठवलं. त्यानंतर त्यांची सासू मार्केटमध्ये गेली. तर सासरा काही कामासाठी कोर्टात गेला. सोनी घरामध्ये एकट्याच होत्या. त्यावेळी आरोपीने उमाशंकरने त्यांच्या गळ्यावर चाकू फिरवला. जास्त रक्तस्राव झाल्यामुळे सोनी यांचा जागीच मृत्यू झाला. सोनी यांची सासू घरी आल्यानंतर हे प्रकरण समोर आले. त्यानंतर पोलिसांनी घटनास्थळी धाव घेत तपास सुरू केला. पोलिसांनी भाजप नेता, त्याचे आई-वडिला यांना अटक केली. पोलिस अधिक तपास करत आहेत.