आग्रा - मथुरा महामार्गावरून एक भीषण अपघाताची घटना उघडकीस आली आहे. एनएन मेडिकल कॉलेजमधील एमबीबीएसच्या तृतीय वर्षाच्या दोन विद्यार्थ्यांचा दुर्देवी मृत्यू झाला. दोघेही दुचाकीवरून जात होते. यादरम्यान गाडीवरील नियंत्रण सुटले. दोन्ही विद्यार्थ्यांचे डोके दुभाजकावर जोरात आदळले. यामुळे डोक्यावरील हेल्मेट तुटले. तसेच दोन्ही विद्यार्थी रस्त्यावर कोसळले. या अपघातात दोघांचा दुर्देवी मृत्यू झाला.

हरिपर्वत पोलिसांनी दिलेल्या माहितीनुसार, ही अपघाताची भीषण घटना सायंकाळी ६ वाजेच्या सुमारास घडली. दोन्ही विद्यार्थी दुचाकीवरून मथुराच्या दिशेनं जात होते. आयएबीटी पुलाजवळ तरूणाचा दुचाकीवरील नियंत्रण सुटले. दोन्ही विद्यार्थी जमिनीवर कोसळले. यामुळे विद्यार्थ्यांचे डोके दुभाजकावर आदळले. गंभीर दुखापतींमुळे त्यांच्या तोंडातून आणि डोक्यातून प्रचंड रक्तस्त्राव झाला.

अपघात घडल्यानंतर काही काळ वाहतूक ठप्प झाली होती. स्थानिकांनी पोलिसांना याबाबतची माहिती दिली. पोलिसांनी घटनास्थळी पोहोचून दोन्ही गंभीर जखमी विद्यार्थ्यांना जवळच्या खासगी रूग्णालयात दाखल केले. मात्र, उपचाराआधीच दोघांचाही मृत्यू झाला. पोलिसांनी अधिकची चौकशी केली. मृतांची ओळख पटली आहे. सिद्ध गर्ग (वय वर्ष २२) आणि तनिष्क गुप्ता (वय वर्ष २२) असे मृत तरूणांची नावे आहेत.

दोन्ही विद्यार्थ्यांच्या मृत्यूची बातमी कुटुंबाला कळताच त्यांच्यावर दुखा:चा डोंगर कोसळला आहे. मुलाचा मृतदेह पाहून विद्यार्थ्यांना धक्काच बसला. या दुर्देवी अपघातानंतर पोलिसांनी परिसरातील सीसीटीव्ही कॅमेरे तपासले. सध्य सीसीटीव्ही कॅमेऱ्याच्या आधारे पोलिसांचा पुढील तपास सुरू आहे. एसओ हरिपर्वत नीरज शर्मा म्हणाले की, 'हा अपघात नेमका कसा घडला? याचा तपास केला जाईल. वाहन चालकाची ओळख पटवून कारवाई केली जाईल'.

या घटनेबाबत सिद्ध गर्ग याच्या वडिलांनी संताप व्यक्त केला आहे. 'दोन्ही मुले एक तास रस्त्यावर वेदनेने विव्हळत पडून होते. जर कुणी पुढाकर घेऊन दोघांना रूग्णालयात नेले असते तर, आज त्यांचे प्राण वाचले असते. ना पोलीस वेळेवर घटनास्थळी पोहोचले, ना स्थानिकांनी तरूणांना रूग्णालयात नेले', असं सिद्धचे वडील म्हणाले.