अमेरिकेचे राष्ट्राध्यक्ष डोनाल्ड ट्रम्प यांना भारत आणि रशियाची मैत्री चांगलीच खटकलीय.. भारत रशियाकडून खनिज तेल आणि शस्त्रांचा व्यापार करत असल्याने अमेरिकेने आयात शुल्काच्या माध्यमातून भारताला तब्बल 25 टक्के दंड ठोठावण्याचा निर्णय घेतलाय. त्यामुळे भारताचं टेन्शन वाढलंय.

आयात शुल्काबाबत काय म्हणाले ट्रम्प ?

अनेक वर्षांपासून भारतासोबत मैत्रीपूर्ण संबंध, मात्र व्यापार कमी

भारत जगात सर्वाधिक आयात शुल्क लादणारा देश

भारत रशियाकडून मोठ्या प्रमाणात लष्करी साहित्य, कच्चं तेल विकत घेतो

रशियाने युक्रेनच्या नागरिकांना मारणं थांबवावं असं वाटत असेल तर हे योग्य नाही

त्यामुळे 1 ऑगस्टपासून भारताला 25 % आयात शुल्कासोबत अतिरिक्त दंड लावण्याचा निर्णय

खरं तर 2 एप्रिलला अमेरिकेने भारतावर लावलेलं 27 टक्के टॅरिफ मागे घेतलं. त्यानंतर भारताने अमेरिकेसोबत चर्चेतून मार्ग काढण्याचा प्रयत्न केला. मात्र डोनाल्ड ट्रम्प यांनी आडमुठपणाने रशियासोबतचा व्यापार थांबवला तरच भारताला टॅरिफमधून सुट देण्याची भूमिका घेतली. मात्र भारताने पारंपरिक मित्र असलेल्या रशियासोबतचा व्यापार कायम ठेवला आणि हिच गोष्ट ट्रम्प यांना खटकली. त्यामुळेच ट्रम्प यांनी भारताला धक्का दिलाय.

ट्रम्पचा धक्का, भारताला फटका?

भारताची अमेरिकेत 124 अब्ज डॉलरचा व्यापार

भारताकडून कापड, औषधं, रसायने, IT सेवेची 81 अब्ज डॉलरची निर्यात

भारताकडून अमेरिकेला 28 टक्के कापडाची निर्यात

औषधं, IT सेवा, इलेक्ट्रॉनिक्स उपकरणं, दागिने, ऑटोमोबाईल्स पार्टसवर परिणाम

रशियाकडून भारताला सवलतीच्या दरात कच्चं तेल मिळतं. त्यामुळे भारत रशियातून तब्बल 35 टक्के खनिज तेल आयात करतो. मात्र आता अमेरिकेने भारताची कोंडी केल्याने सरकार अलर्टवर आलंय. तर वाणिज्यमंत्री पियुष गोयल यांनी उच्चस्तरीय बैठक घेतलीय. त्यामुळे आता भारत अमेरिकेच्या दबावापुढे झुकणार की आपला कणखर बाणा कायम ठेवत नवे पर्याय शोधणार? याकडे जगाचं लक्ष लागलंय.