एकीकडे महाराष्ट्रात किमान तापमानात वाढ होत आहे. त्यामुळे उकाडा तापदायक ठरत आहे. तर दुसरीकडे निसर्गरम्य हिमाचलमध्ये सध्या निसर्गाचे रौद्र रूप पाहायला मिळत आहे. याठिकाणी किमान तापमानात घट झाली असून थंडीचा कडाका वाढला आहे. मुंबईतील एक तरुणी या थंडीचा बळी ठरली आहे. मनाली येथे पर्यटनासाठी गेलेल्या तरुणीचा अतिथंडीमुळे मृत्यू झाला आहे.

मिळालेल्या माहितीनुसार, प्रियंका विष्णू दुखंढे असे मृत मुलीचे नाव असून ती मुंबईतील काळाचौकी परिसरात रहिवाशी होती. प्रियंका ही आपल्या मावशीसोबत मनालीपासून १५ किमी अंतरावर असलेल्या प्रसिद्ध सोलांग व्हॅलीमध्ये फिरायलागेली होती. मात्र तिथून परत येत असताना तिला अचानक थंडी भरली आणि हुडहुडी भरली.

तिची प्रकृती हळूहळू गंभीर होऊ लागली. म्हणून तिला तात्काळ मनालीतील एका रुग्णालयात नेण्यात आले. पण रुग्णालयात पोहचताच डॉक्टरांनी तिला मृत घोषित केले. 'कोल्ड एक्स्पोजर'मुळे हा मृत्यू झाल्याचा प्राथमिक अंदाज असल्याचं डॉक्टरांनी म्हटलं आहे.

उत्तर भारतात कडाक्याची थंडी पडत असून मनालीतील तापमान शून्याखाली गेले आहे. शिवाय थंडीच नाही, तर इतर नैसर्गिक आपत्तींनीही इथे थैमान घातले आहे. गुरुवारी पहाटे ३.५९ वाजता किन्नौर जिल्ह्यात ३.५ रिश्टर स्केल तीव्रतेचा भूकंपाचा धक्का बसला. याचा केंद्रबिंदू चांगो परिसरात होता. कुल्लू जिल्ह्यातील पहनाला गावाजवळ गुरुवारी सकाळी भूस्खलन झाल्याने काही काळ भीतीचे वातावरण निर्माण झाले होते.