Shooting : एका बारमध्ये अज्ञातांकडून अंदाधुंद गोळीबार करण्यात आला. या गोळीबारामध्ये चौघांचा मृत्यू झाला. तर २० नागरिक जखमी झाले. जखमींना जवळच्या रुग्णालयात दाखल करण्यात आले आहे. मृतक आणि जखमींच्या संख्येमध्ये वाढ होऊ शकते असे अधिकाऱ्यांनी म्हटले आहे. ही घटना अमेरिकेच्या दक्षिण कॅरोलिनामधील एका बारमध्ये घडली आहे.

मिळालेल्या माहितीनुसार, दक्षिण कॅरोलिनाच्या सेंट हेलेना बेटावरील विलीज बार अँड ग्रिल येथे गोळीबाराची घटना घडली. गोळीबाराच्या वेळी बारमध्ये मोठी गर्दी जमली होती. गोळीबारामध्ये चार जणांचा दुर्देवी मृत्यू झाला आहे. तसेच किमान २० जण जखमी झाल्याचे वृत्त आहे. ही घटना रविवारी (१२ ऑक्टोबर) पहाटे घडल्याची प्राथमिक माहिती आहे.

स्थानिक पोलिसांनी या घटनेची माहिती दिली आहे. ब्यूफोर्ट काउंटी शेरीफ कार्यालयाने यासंंबंधित एक्स पोस्ट शेअर केली आहे. पोलिसांनी मृतक आणि जखमींची माहिती दिली. 'गोळीबार होत असताना स्वत:चा बचाव करण्यासाठी अनेकजण पळाले, ज्यांना लपायची जागा मिळाल, ते लपून बसले. ही घटना अत्यंत दुःखद आणि वेदनादायक आहे. आमचा तपास सुरु आहे. यादरम्यान नागरिकांनी संयम बाळगावा अशी विनंती', असे एक्स पोस्टमध्ये म्हटले आहे.

चौघांचा जागीच मृत्यू झाला. किमान २० जण जखमी आहेत. जखमींपैकी चार जणांची प्रकृती गंभीर असल्याचे पोलिसांनी सांगितले आहे. जखमींवर जवळच्या स्थानिक रुग्णालयात उपचार सुरु आहेत. अद्याप मृतक आणि जखमींची ओळख जाहीर करण्यात आलेली नाही. गोळीबाराच्या घटनेमुळे परिसरात मोठी खळबळ उडाली आहे.