Shocking Toilet Explosion in Greater Noida : उत्तर प्रदेशमधील ग्रेटर नोएडामध्ये एक धक्कादायक घटना घडली आहे. फ्लश दाबल्यानंतर टॉयलेटमध्ये जोरदार स्फोट झाला. त्यानंतर भीषण आग लागली. या घटनेत २० वर्षीय तरूण गंभीर जखमी झालाय. उत्तर प्रदेशच्या ग्रेटर नोएडाच्या सेक्टर ३६ मध्ये रविवारी ही धक्कादायक घटना घडली. या दुर्दैवी घटनेत आशू नागर हा तरुण दुखापतग्रस्त झालाय. तरूणाचा चेहरा, हात अन् पाय गंभीर भाजले गेलेत. तरूण या अपघातात ३५ टक्के भाजला गेलाय. तरूणाला जवळच्या जिम्स रूग्णालयात उपचारासाठी दाखल करण्यात आलेय. त्याची प्रकृती चिंताजनक असल्याचे समजतेय.

टॉयलेटमध्ये स्फोट होण्याची ही पहिलीच घटना नाही. याआधी २०१८ मध्ये नवी मुंबईतही असाच स्फोट झाला होता. त्यामध्ये ती व्यक्ती जखमी झाली होती. तज्ज्ञांचे म्हणणे आहे की, सीवर लाईनमधील मिथेन गॅसचा दाब वाढला आणि हवेशी संपर्क आल्यास यासारखे स्फोट होऊ शकतात. ग्रेटर नोएडामधील या घटनेमुळे नागरिकांमध्ये भीतीचे वातावरण आहे. स्थानिकांनी प्रशासनाला सीवर व्यवस्थेची नियमित तपासणी आणि देखभाल करण्याची मागणी केली आहे.पोलिसांनी नागरिकांना सावध राहण्याचे आणि संशयास्पद वास आल्यास त्वरित प्रशासनाला कळवण्याचे आवाहन केले आहे.

पोलिसांनी दिलेल्या माहितीनुसार, आशू नागर टॉयलेटमध्ये गेला होता. फ्लश दाबताच जोरदार स्फोट झाला. हा स्फोट इतका तीव्र होता की, टॉयलेट सीटचे तुकडे झाले आणि आग लागली. या घटनेत आशू गंभीर जखमी झालाय. अंगावर जखमा आहेत, त्याशिवाय तो गंभीर भाजला गेलाय. प्राथमिक तपासात सीवर लाईनमधील अडथळ्यामुळे मिथेन गॅस तयार झाल्याने हा स्फोट झाल्याचा संशय आहे. या गॅसच्या दाबामुळे टॉयलेट सीट फुटली आणि आग पसरली. स्थानिकांनी त्वरित आग विझवण्याचा प्रयत्न केला आणि आशूला रुग्णालयात नेले.

टॉयलेटमध्ये स्फोट झाल्याची घटनेने एकच खळबळ उढाली. येथील स्थानिकांनी ग्रेटर नोएडा प्राधिकरणावर निष्काळजीपणाचा आरोप केलाय. सीवर लाईनची नियमित देखभाल न झाल्याने ही दुर्घटना घडल्याचा आरोप स्थानिकांनी केलाय. नागरिकांच्या संतापानंतर पोलिसांनी या प्रकरणाचा तपास सुरू केला आहे. राकेशकुमार यांनी सांगितले की, सीवर लाईनच्या देखभालीचा अहवाल तपासला जाईल. प्राधिकरणानेही या प्रकरणाची चौकशी सुरू केली आहे.