दिल्लीतील दयालपूर येथील मुंगा नगर परिसरात शनिवारी दुपारी कौटुंबिक वादातून धक्कादायक घटना घडली. आपल्या पत्नीशी आणि सासरच्या मंडळींसोबत झालेल्या चर्चेदरम्यान संतापाच्या भरात एका व्यक्तीने पिस्तूल काढून पत्नीवर गोळ्या झाडल्या. या घटनेदरम्यान आपल्या आईला वाचवण्यासाठी पुढे आलेल्या मुलालाही गोळी लागली.

रिजवाना परवीन आणि तिचा मुलगा अरबाज यांना तातडीने शास्त्री पार्क येथील जग प्रवेश चंद्र रुग्णालयात दाखल करण्यात आले. प्राथमिक उपचारानंतर दोघांनाही जीटीबी रुग्णालयात हलवण्यात आले. डॉक्टरांच्या माहितीनुसार रिझवानाच्या छातीत गोळी लागल्याने तिची प्रकृती गंभीर आहे, तर अरबाजच्या हाताला इजा झाली आहे.

पोलिस तपासात समोर आले आहे की, अब्दुल करीम आणि त्याची पत्नी रिझवाना यांच्यात बराच काळ वाद सुरू होता. सततच्या भांडणांमुळे चार महिन्यांपूर्वी रिझवाना आपल्या मुलासह माहेरी राहायला गेली होती. ती दयालपूरच्या मुंगा नगर परिसरात आई-वडील आणि भावासोबत राहत होती. शनिवारी अब्दुल करीम आपल्या पत्नीच्या कुटुंबाशी बोलण्यासाठी पोहोचला. तळमजल्यावर चर्चा सुरू असताना अचानक त्याने पिस्तूल काढून रिझवानाच्या छातीत गोळी झाडली. दुसरी गोळी झाडण्याचा प्रयत्न करताच तिचा मुलगा अरबाज आईच्या बचावासाठी पुढे आला आणि त्याला देखील गोळी लागली.

या घटनेनंतर परिसरात भीतीचे वातावरण पसरले. घटना स्थळावरून पोलिसांना चार फाटलेल्या काडतुसांचे कवच सापडले. माहिती मिळताच गुन्हे शाखा आणि एफएसएलची टीम घटनास्थळी पोहोचली. जिल्हा पोलिस उपायुक्त आशिष मिश्रा यांनी सांगितले की, या प्रकरणात हत्येच्या प्रयत्नाचा गुन्हा दाखल करण्यात आला आहे. आरोपी अब्दुल करीम फरार असून त्याचा शोध सुरू आहे.