तुर्कीच्या कहरमनमारस प्रांतातील माध्यमिक शाळेत गोळीबार झाल्याची घटना घडली आहे. या गोळीबारात चार जणांचा जागीच मृत्यू झाला आहे. या घटनेत २० हून अधिक विद्यार्थी जखमी झाले आहेत. आयसर कालिक माध्यमिक शाळेत हा एका विद्यार्थाने गोळीबार केला. गोळीबाराच्या घटनेने परिसरात खळबळ उडाली आहे. घटनेची माहिती मिळताच पोलिसांनी घटनास्थळी धाव घेतली. सलग दुसऱ्या दिवशी तुर्कीत गोळीबाराची घटना घडली आहे.

गवर्नर मुकर्रम उनलुअर यांनी सांगितलं की, 'तु्र्कीच्या दक्षिण पूर्व प्रांतात बुधवारी कहराममारस शाळेजवळ एका शाळेत गोळीबार झाल्याची घटना घडली. चार लोकांचा मृत्यू झाला आहे. २० हून अधिक जण जखमी झाले आहेत'. उनलुअर यांनी सांगितलं की, 'मृतांमध्ये एका शिक्षकाचा देखील समावेश आहे. हल्ला करणारा विद्यार्थी होता. त्याने त्याच्या वडिलांच्या बंदुकीने शाळेत गोळीबार केला. त्याने बॅगेत बंदूक लपवून आणली होती. तर हल्लेखोराचाही मृत्यू झाल्याची माहिती समोर आली आहे. गोळीबारात जखमी झालेल्या विद्यार्थ्यांना तातडीने रुग्णवाहिकेने रुग्णालयात दाखल केले'.

दक्षिण पूर्व तुर्कीतील एका शाळेत मंगळवारी गोळीबाराची घटना घडली. यात १६ लोक जखमी झाले. स्थानिक गवर्नर हसन शिलडक यांनी सांगितलं होतं की, 'गोळीबार करणाऱ्याचं वय १८-१९ वर्ष इतकं होतं. त्याने शॉटगनने अंदाधुंद गोळीबार केला. गोळीबार केल्यानंतर विद्यार्थ्याने स्वत:वरही गोळ्या झाडल्या. या गोळीबारात १० विद्यार्थी, ४ शिक्षक, एक कँटीन कर्मचारी आणि एका पोलीस अधिकाऱ्याचाही समावेश होता.

तुर्कीतील ही घटना कोयंकु वोकेशनल अँड टेक्निकल एनाटोलियन शाळेत सकाळी ९.३० वाजता घडली होती. गोळीबारानंतर शाळा रिकामी करण्यात आली आहे. जखमींना तातडीने जवळील रुग्णालयात दाखल केलं होतं. तर ५ जणांना पुढील उपचारासाठी दुसऱ्या रुग्णालयात दाखल केले होते.