नात्याला काळीमा फासणारी एक अत्यंत धक्कादायक घटना उत्तर प्रदेशातून समोर आली आहे. कानपूरमध्ये एका रेल्वे इंजिनिअरने आपल्याच सुनेला जबरदस्ती दारू पाजून तिच्यावर बलात्कार केल्याचा खळबळजनक प्रकार उघडकीस आला आहे. पीडित महिलेच्या तक्रारीनंतर पोलिसांनी नराधम सासऱ्याविरुद्ध गुन्हा दाखल केला. या घटनेमुळे संपूर्ण परिसरात तीव्र संताप व्यक्त होत आहे.

पीडितेने पोलिसांत दिलेल्या तक्रारीनुसार, घरात कोणी नसताना आरोपी सासऱ्याने तिच्या एकटेपणाचा गैरफायदा घेतला. तिच्यावर पाळत ठेवून सासऱ्याने हे घाणेरडं कृत्य केलं. पीडितेने या कृत्याला कडाडून विरोध करण्याचा प्रयत्न केला. पण नराधम सासऱ्याने तिला आणि तिच्या पतीला जीवे मारण्याची धमकी दिली. या सततच्या त्रासाला आणि धमक्यांना कंटाळून अखेर पीडित सुनेने हिंमत करून पोलीस ठाणे गाठले आणि सासऱ्याचा खरा चेहरा जगासमोर आणला. पोलीस सध्या या प्रकरणाचा सखोल तपास केला जात आहे.

आरोपीचे नाव मुकेश तिवारी आहे. त्याचे वय ५८ वर्षे असल्याचे सांगितले जात आहे. सुनेवरील बलात्काराचे प्रकरण उघडकीस आल्यानंतर मुकेश तिवारी फरार होता. पण पोलिसांनी त्याला लखनौच्या आलमबाग येथील कॅरेज रिपेअर वर्कशॉपजवळ अटक करण्यात आली आहे. पोलिसांनी सांगितले की, तिवारी रेल्वेमध्ये वरिष्ठ विभाग अभियंता (सिनियर सेक्शन इंजिनिअर) म्हणून कार्यरत आहे. तपासादरम्यान मिळालेल्या माहितीच्या आधारे त्यांच्यावर बलात्काराचा गुन्हा दाखल केला. पीडित सुनेने सांगितले की, नोव्हेंबर २०२३ मध्ये आरोपी अभियंत्याचा मुलगा अभिषेक तिवारी याच्याशी तिचे लग्न झाले होते. काही दिवस सर्व काही ठीक होते आणि त्यानंतर लगेचच हुंड्यासाठी तिचा छळ सुरू झाला. सासरच्या घरी मारहाण करण्यात आली, तिला जबरदस्तीने दारू पाजण्यात आली आणि तिचा मानसिक व शारीरिक छळ केला.

२० एप्रिल २०२४ रोजी माहेरून परत आल्यानंतर तिच्या सासऱ्याने तिला जबरदस्तीने गुंगीचे औषध देऊन बेशुद्ध केले आणि तिच्यावर बलात्कार केला. तीन दिवस तिला एका खोलीत कैदेत ठेवण्यात आले आणि तिचा सतत शारीरिक छळ करण्यात आला. तिने हिंमत करून पोलिसांशी संपर्क साधला. त्यानंतर तिची सुटका झाली.