दिल्लीतील जंतर मंतर येथे विद्यार्थ्यांनी केलेल्या नीट पेपर फुटी प्रकरणी आंदोलनाला यश मिळालं असून या आंदोलनादरम्यान विद्यार्थ्यांवर लाठी चार्ज करण्यात आला. तसेच विद्यार्थ्यांनी केलेल्या या आंदोलनाला अनेकांनी ट्रोल केले. अशातच आता काँग्रेस आणि सीजेपीविरोधात भाजप नेते आमदार यशपाल सुवर्णा यांनी वादग्रस्त वक्तव्य केलं. याप्रकरणी त्यांच्यावर एफआयआर दाखल करण्यात आला आहे. उडुपी जिल्हा काँग्रेस अध्यक्ष अशोक कुमार कोडवूर यांच्या तक्रारीवरून हा गुन्हा नोंदवण्यात आला आहे.

दरम्यान, केपीसीसीचे कार्याध्यक्ष आणि विधान परिषद सदस्य मंजुनाथ भांडारी यांनी राज्य सरकारने या प्रकरणाची गंभीर दखल घेतल्याचे सांगितले. विरोधी पक्षनेते राहुल गांधी यांच्याविरोधात यशपाल सुवर्णा यांनी केलेल्या आक्षेपार्ह वक्तव्यांची सर्व बाजूंनी चौकशी केली जात असून कायद्यानुसार कठोर कारवाई केली जाईल, असे त्यांनी म्हटले.

भांडारी यांनी आरोप केला की, भाजपच्या कार्यक्रमात सुवर्णा यांनी राहुल गांधी हे २४ तास ड्रग्सच्या नशेत असतात असं वक्तव्य केलं असून, "आम्ही राहुल गांधींचा वंश संपवू" असेही त्यांनी जाहीरपणे म्हटल्याचा दावा त्यांनी केला. या भाषणाचे व्हिडिओ पुरावे उपलब्ध असल्याचेही त्यांनी सांगितले.

याच कार्यक्रमात उपस्थित असलेल्या उडुपीतील इतर भाजप आमदारांनी या वक्तव्याचा निषेध न केल्याबद्दलही भांडारी यांनी टीका केली. त्यांचे मौन हे अशा वक्तव्यांना अप्रत्यक्ष पाठिंबा असल्याचेही ते म्हणाले. राहुल गांधी आणि सीजेपी विरोधात केलेल्या या वादग्रस्त वक्तव्याने आता संबंधित भाजप नेते आमदार यशपाल सुवर्णा यांच्यावर तक्रार दाखल करण्यात आली आहे. या प्रकरणात भारतीय न्याय संहिता (बीएनएस) कलम 57, 192, 196(2), 351(2), 352 आणि 353(2) अंतर्गत गुन्हा दाखल करण्यात आला असून पुढील कायदेशीर कारवाई सुरू असल्याचे पोलिसांनी स्पष्ट केले.