PNB scam mastermind Mehul Choksi Arrested : पंजाब नॅशनल बँक (PNB) घोटाळ्यातील प्रमुख आरोपी आणि हिरे व्यापारी मेहुल चोक्सी याला अटक करण्यात आली आहे. सूत्रांनी दिलेल्या माहितीनुसार, बेल्जियम पोलिसांनी चोक्सी याला बेड्या ठोकल्या आहेत. सीबीआयच्या माहितीच्या आधारावर बेल्जियम पोलिसांनी चोक्सी याला रविवारी अटक केली. भारत आता चोक्सी याच्या प्रत्यर्पणासाठी बेल्जियम सरकारकडे औपचारिक मागणी करणार असल्याचे सांगण्या येत आहे. (PNB bank fraud 13500 crore)

मेहुल चोक्सी आणि त्याचा भाचा नीरव मोदी यांच्यावर पीएनबीमधून १३,५०० कोटी रुपयांचा घोटाळा (PNB Scam) केल्याचा आरोप आहे. हा घोटाळा उघडकीस येण्यापूर्वीच २०१८ मध्ये चोक्सीने भारतातून पळ काढला होता. त्यानंतर तो अँटिग्वा आणि बार्बुडामध्ये लपून बसला होता. बेल्जियममधील अँटवर्प येथे पत्नी प्रीती चोक्सीसोबत राहत होता. सीबीआयच्या माहितीच्या आधारावर रविवारी बेल्जियम पोलिसांनी मेहुल चोक्सी याला बेड्या ठोकल्या आहेत.

सीबीआय आणि ईडी यांच्याकडून मागील अनेक वर्षांपासून चोक्सीचा शोध घेतला जात होता. बेल्जियम पोलिसांनी सीबीआयच्या सूचनेनुसार चोक्सी याला अटक केल्याची माहिती मिळत आहे. चोक्सी याच्या प्रत्यर्पण प्रक्रियेसाठी भारताने पावले उचलली आहेत. चोक्सीच्या वकिलांनी यापूर्वी त्याच्या प्रकृतीचे कारण देत प्रत्यर्पणाला विरोध केला होता. मात्र, आता अटकेमुळे भारतात आणता येणार आहे.

मेहुल चोक्सी याने केलेल्या १३,५०० कोटी रुपयांच्या घोटाळ्यामुळे पीएनबीला मोठा आर्थिक फटका बसला होता. चोक्सीच्या अटकेमुळे बँक घोटाळ्याप्रकरणी दोषींवर कारवाईला अधिक वेग येणार आहे. चोक्सी याला भारतात कधी आणले जाणार, याकडे आता सर्वांच्या नजरा लागल्या आहेत.