Maharashtra politics : अजितदादांचा ठाकरेंना धक्का, रायगडच्या हुकमी एक्क्याने मशाल सोडली

Roha Shiv Sena leader resigns join NCP : उद्धव ठाकरेंच्या शिवसेनेला विधानसभेनंतर राजकीय धक्के बसत आहे. विशेषकरून कोकणातून दिग्गज नेते ठाकरेंची साथ सोडत आहेत. रायगडमध्ये ठाकरेंना मोठा धक्का बसला आहे. शिवसेना (उद्धव बाळासाहेब ठाकरे) गटाचे रोहा तालुका प्रमुख समीर शेडगे यांनी शिवसेना ठाकरे गटाला रामराम केलाय. शेडगे यांनी अजित पवार यांच्या नेतृत्वाखालील राष्ट्रवादी काँग्रेस पक्षात प्रवेश केला आहे. रविवारी रोहा येथील राम मारुती चौकात झालेल्या जाहीर सभेत शेडगे यांनी अजितदादांच्या राष्ट्रवादीमध्ये प्रवेश केला. या पक्ष प्रवेश सोहळ्याला राष्ट्रवादी काँग्रेसचे प्रदेशाध्यक्ष खासदार सुनील तटकरे आणि राज्यमंत्री आदिती तटकरे यांची उपस्थिती होती.

समीर शेडगे हे रोहा तालुक्यातील प्रभावी नेतृत्व आणि संघटन कौशल्यासाठी ओळखले जातात. शेडगे यांनी साथ सोडल्यामुळे रायगडमध्ये ठाकरे गटाला मोठा धक्का बसला आहे. रायगडमधील स्थानिक पातळीवरील पक्षाची ताकद कमकुवत होण्याची शक्यता आहे. प्रवेश सोहळ्यात बोलताना सुनील तटकरे यांनी शेडगे यांचे स्वागत केले. ते म्हणाले की, “समीर शेडगे यांचा अनुभव आणि जनसंपर्क यामुळे राष्ट्रवादी काँग्रेसला रोहा तालुक्यात बळ मिळेल. त्यांच्या पक्षप्रवेशाने पक्षवाढीला निश्चितच चालना मिळेल.”

आदिती तटकरे यांनीही शेडगे यांच्या निर्णयाचे कौतुक केले आणि कार्यकर्त्यांना एकजुटीने काम करण्याचे आवाहन केले. या पक्षांतरामागे स्थानिक राजकारणातील बदलते समीकरण आणि आगामी स्थानिक स्वराज्य संस्थाच्या निवडणुकांचा प्रभाव असल्याची राजकीय चर्चा आहे. शेडगे यांच्यासोबत काही कार्यकर्त्यांनीही राष्ट्रवादीत प्रवेश केल्याने ठाकरे गटासाठी हा मोठा झटका मानला जात आहे.