Lahor News : पाकिस्तानच्या पूर्व भागात एका कारखान्यात बॉयलर फुटला. स्फोट इतका भीषण होता की आजूबाजूचा परिसर हादरला. या स्फोटात १५ कामगारांचा मृत्यू झाल्याचे प्राथमिक वृत्त आहे. तर अन्य सात जण जखमी झाले आहेत. कारखान्यातील बॉयलरचा स्फोट झाला. त्याचे हादरे आजूबाजूच्या परिसरातही बसले.

पाकिस्तानच्या पूर्वेकडील भागात हा कारखाना आहे. त्यातील बॉयलरचा स्फोट झाला. स्फोट इतका भीषण होता की आजूबाजूचा परिसरही हादरून गेला. आतापर्यंत मिळालेल्या माहितीनुसार, या दुर्घटनेत किमान १५ कामगार मृत्युमुखी पडले आहेत. तर अन्य काही कामगार जखमी झाले आहेत. पोलिसांच्या माहितीनुसार, या घटनेनंतर कारखान्यातील मॅनेजरला अटक करण्यात आली आहे. मीडिया रिपोर्टनुसार स्फोटानंतर कारखान्याचा मालक फरार झाला आहे. त्याचा शोध घेतला जात आहे.

पंजाब प्रांतातील फैसलाबाद शहराजवळ हा कारखाना असून, त्यातील बॉयलरमध्ये स्फोट झाला. स्फोटाचं नेमकं कारण अद्याप समजू शकलेलं नाही. स्थानिक प्रशासनानुसार, बॉयलरचा स्फोट इतका भीषण होता की कारखाना आणि आजूबाजूच्या घरांनाही हादरे बसले. त्या घरांचेही मोठे नुकसान झाले आहे. स्फोटानंतर या कारखान्यात आग लागली. या घटनेचा तपास सुरू असून नेमक्या कारणांचाही शोध घेतला जात आहे.

पंजाबचे मुख्यमंत्री मरियम नवाझ शरीफ यांनी या दुर्घटनेनंतर शोक व्यक्त केला आहे. या स्फोटात जखमी झालेल्या सर्व कामगारांना उपचार मिळतील हे सुनिश्चित करण्यात यावे, अशा सूचना त्यांनी संबंधित अधिकाऱ्यांना केल्या आहेत.

सुरक्षिततेची खबरदारी न घेतल्याने पाकिस्तानमधील औद्योगिक क्षेत्रातील दुर्घटना आणि कारखान्यांमधील आगीच्या घटना घडतात, असे एक कारण समोर आले आहे. २०२४ मध्ये फैसलाबादच्या कापड कारखान्यातही बॉयलर स्फोट होऊन डझनभर कामगार जखमी झाले होते. मागील आठवड्यातच पाकिस्तानच्या कराचीमध्ये फटाक्यांच्या कारखान्यात स्फोट होऊन चार कामगारांचा मृत्यू झाला होता.