• पाकिस्तानच्या आत्मघाती हल्ला

• डेरा इस्माईल खानमध्ये पोलिस चौकीवर आत्मघाती हल्ला

• स्फोटात १३ जणांचा मृत्यू तर ३५ जण जखमी

• पोलिस चौकीवर स्फोटकांनी भरलेले वाहन धडकवले

पाकिस्तान आत्मघाती हल्ल्याने हादरला. शनिवारी वायव्य पाकिस्तानमध्ये रस्त्यावरील पोलीस चौकीवर आत्मघाती बॉम्ब हल्ला करण्यात आला. या हल्ल्यात १३ जणांचा मृत्यू झाला तर ३५ जण जखमी झाले. या घटनेमुळे पोलीस ठाण्यासह आसपासच्या परिरातील वाहनांचे मोठे नुकसान झाले. या स्फोटानंतर बचावकार्य आणि मदतकार्य करण्यात आले. जखमींना तात्काळ रुग्णालयात दाखल करण्यात आले. या स्फोटाचा तपास सध्या सुरू आहे.

प्रांतीय आपत्कालीन सेवांचे प्रवक्ते बिलाल फैजी यांनी सांगितले की, खैबर पख्तुनख्वा प्रांतातील डेरा इस्माईल खान जिल्ह्यात झालेल्या या हल्ल्यात स्फोटकांनी भरलेल्या वाहनाचा वापर करण्यात आला होता. स्थानिक पोलीस प्रमुख सफदर बलोच यांनी सांगितले की, मृत आणि जखमींपैकी बहुतेक जण पोलीस कर्मचारी आणि वाटसरू होते. या स्फोटामुळे एक प्रमुख पोलीस चौकी उद्ध्वस्त झाली आणि प्रत्यक्षदर्शींनी हल्ल्यानंतर गोळीबाराचा आवाज ऐकल्याचे सांगितले आहे.

या हल्ल्यानंतर घटनास्थळी सुरक्षा दलाने धाव घेत पत्कालीन पथके पीडितांना जवळच्या रुग्णालयात नेत असताना, बंदूकधाऱ्यांनी रुग्णवाहिकेवर गोळीबार केला. ज्यात एक बचाव कर्मचारी ठार झाला आणि इतर दोघे जखमी झाले. या आत्मघाती हल्ल्यानंतर मृत्यू झालेल्यांमध्ये दोन महिला आणि एका मुलाचा समावेश आहे. पाकिस्तानी तालिबान, ज्याला अधिकृतपणे तहरीक-ए-तालिबान पाकिस्तान किंवा टीटीपी म्हणून ओळखले जाते त्याने या हल्ल्याची जबाबदारी स्वीकारली आहे.