काही दिवसात बिहारमध्ये निवडणुका होणार आहेत. या आधीच राज्य सरकारने एक मोठा निर्णय घेतलाय. मुख्यमंत्री नितीश कुमार यांनी शिक्षक भरतीमध्ये अधिवास धोरण लागू करण्याचा निर्णय घेतलाय. या धोरणामुळे, भरतीमध्ये फक्त बिहारमधील रहिवाशांनाच प्राधान्य दिले जाणार आहे. आता बिहारमध्ये भूमिपुत्रांनाच संधी मिळणार आहे. दरम्यान हा बदल TRE-4, TRE-5 पासून लागू केला जाणार आहे.

डोमिसाईल म्हणजे काय?

नागरिक हा त्या राज्यातील रहिवाशी असावा. त्याचे घर किंवा निवासस्थान त्या राज्यात असले पाहिजे. याशिवाय पालक रहिवासी असणे, पती रहिवासी असणे, घर असणे इत्यादी अनेक अटींच्या आधारे अधिवास श्रेणीत समावेश केला जाऊ शकतो. दरम्यान राज्यात हा निर्णय लागू झाला तर त्याच राज्यातील लोकांना या भरतीमध्ये अर्ज करता येतो.

राज्यातील रहिवाशांनाच नोकरी देताना प्राधान्य दिले जाते. बिहारमध्ये डोमिसाईलचा निर्णय लागू झाला तर लवकरच होणाऱ्या शिक्षक भरतीमध्ये बिहारमधील लोकांना प्राधान्य दिले जाईल.

दरम्यान बिहारमध्ये शिक्षक भरती परीक्षेत डोमिसाईल धोरण लागू करण्यासाठी आंदोलन करण्यात आले होते. या मागणीसाठी उमेदवारांनी १ ऑगस्ट रोजी पायी मोर्चा काढला होता. विद्यार्थी नेते दिलीप कुमार यांच्या नेतृत्वाखाली शेकडो विद्यार्थी हातात तिरंगा घेऊन मोर्चा काढला होता. सर्व उमेदवारांना मुख्यमंत्र्यांच्या निवासस्थानाला घेराव घालायचा होता. ते मुख्यमंत्री निवासस्थानाकडे जाण्यासाठी निघाले होते. पण, पाटणा पोलिसांनी त्यांना जेपी गोलंभरजवळ रोखलं होतं.