नेपाळमध्ये सत्तापालट झाला आहे. पंतप्रधान केपी ओली यांनी पदाचा राजीनामा दिला आहे. नव्या पंतप्रधानांच्या नावाची घोषणा आज, संध्याकाळपर्यंत होण्याची शक्यता व्यक्त केली जात आहे. दुसरीकडे आंदोलक अधिक आक्रमक झाले असून, संसद भवन पेटवून दिले.

सोशल मीडियावर बंदी घालण्याच्या निर्णयाविरोधात तरुणांनी पुकारलेल्या आंदोलनांमुळे देशात हिंसक निदर्शने झाली. या निदर्शनांदरम्यान काठमांडूमध्ये २० जणांचा मृत्यू झाला, तर ३०० हून अधिक लोक जखमी झाले. या परिस्थितीमुळे नेपाळचे पंतप्रधान के.पी. शर्मा ओली यांनी पदाचा राजीनामा दिला. शर्मा दुबईला जाणार असल्याचे वृत्त आहे. तसा दावा तेथील माध्यमांनी केला आहे.

नेपाळ सरकारने सोशल मीडियावर बंदी घातल्याने सोमवारी तरुणांनी काठमांडूमध्ये तीव्र निदर्शने केली. या आंदोलनांदरम्यान पोलिसांनी पाण्याचा मारा, अश्रूधूर आणि रबर गोळ्यांचा वापर करून जमावाला पांगवण्याचा प्रयत्न केला. यामुळे हिंसाचार वाढला आणि २० जणांचा मृत्यू झाला, तर ३०० हून अधिक जखमी झाले.

काठमांडूमधील बानेश्वर परिसरात लष्कराला तैनात करावे लागले. या घटनेनंतर सरकारने सोशल मीडियावरील बंदी मागे घेतली, परंतु तरुणांनी मंगळवारी देखील आंदोलने सुरू ठेवली.

आंदोलक संसदेत घुसले

तत्पूर्वी, नेपाळ संसदेत आक्रमक झालेले आंदोलक घुसले. त्यांनी सैन्याकडून शस्त्रे हिसकावून घेतली. दुसरीकडे काठमांडू विमानतळावरील सुरक्षा व्यवस्था वाढवण्यात आली आहे. शहरातील परिस्थिती चिघळली आहे.

आंदोलनाला हिंसक वळण लागलं आहे. संतापलेले आंदोलक संसद भवनात घुसले. त्यांनी अर्थमंत्री विष्णू पौडेल यांना पकडून रस्त्यावर आणले. तसेच त्यांना मारहाण केल्याचे वृत्त समोर आले आहे.