मेरठच्या सौरभ राजपूत हत्याकांडाने संपूर्ण देशाला हादरा बसला आहे. सौरभ राजपूतची निर्घृण हत्या करणारे मुस्कान आणि साहिल पोलिसांच्या ताब्यात आहेत. पोलिसांकडून दोघांची कसून चौकशी सुरु आहे. पोलिसांच्या चौकशीत सौरभची हत्या करणाऱ्या दोन्ही आरोपींनी धक्कादायक खुलासा केला आहे.

सौरभच्या मृतदेहाची ओळख होऊ नये, यासाठी शीर धडापासून वेगळं केल्याचा खुलासा आरोपींनी केला आहे. तसेच, बोटांचे ठसे ओळखू येऊ नये, यासाठी मनगट कापल्याचा खुलासा आरोपींनी केला. आरोपींनी धक्कादायक खुलासा केल्यानंतर पोलीसही हैराण झाले.आरोपींनी अत्यंत शांत डोक्याने सौरभला संपवल्याचं समोर येत आहे.

सौरभ हत्याकांडात पोलिसांनी अनेक पुरावे सापडले आहेत. फॉरेन्सिक टीमला चादर आणि उशीवर हत्येचे पुरावे सापडले. बाथरुमच्या टाईल्स आणि नळावर रक्त आढळलं. सौरभ आणि मुस्कानच्या खोलीत एक सुटकेस होती. त्याच सुटकेसमध्ये मृतदेह टाकण्याचा दोघांनी प्रयत्न केला. मात्र, दोघांना जमलं नाही. त्यानंतर दोघांनी सौरभच्या मृतदेहाचे तुकडे करून एका ड्रममध्ये भरले.

मेरठच्या घरात सौरभची हत्या केली. खोलीतील बेडवर सौरभची हत्या केली. त्यानंतर बाथरुममध्ये मृतदेहाचे तुकडे केले. मृतदेहाचे तुकडे करून ड्रममध्ये टाकले. फॉरेन्सिकच्या पथकाने घरातील सर्व पुरावे जमा केले. त्यानंतर पुढील तपासासाठी एफएसएल लॅबमध्ये पाठवले. सौरभच्या हत्येचे पुराव्यात मिक्सरचा जार, बेडवरील चादर, बाथरुममधील रक्ताचे नमुने, मुस्कानची हँडबॅग, कपडे आणि कागदपत्रांचा समावेश आहे.

दरम्यान, मुस्कान आणि साहिलने सौरभची हत्या करण्यापूर्वी त्याला बेशुद्ध केलं. सौरभला बेशुद्ध केल्यानंतर त्याच्यावर वार केले. दोघांनी मिळून सौरभचे १५ तुकडे केले. दोघांनी सौरभच्या मृतदेहाचे तुकडे करण्यासाठी मिक्सरच्या जारचा देखील वापर केल्याचे समोर आलं आहे. मिक्सरच्या जारवरून दोघांनी सौरभची क्रूर हत्या केल्याचे समोर येत आहे.