मध्यप्रदेशातील झाबुआमधून धक्कादायक बातमी समोर येत आहे. एका तरूणानं जाणूनबुजून तोंडात सुतळी बॉम्ब फोडला. स्फोटामुळे त्याचा चेहरा गंभीरपणे भाजला. प्रत्यक्षदर्शींच्या मते, त्या तरूणाला नवीन ट्रेंड सुरू करायचा होता. तो तोंडात छोटे फटाके फोडत होता. मात्र, त्यानं सुतळी बॉम्ब फोडला. यामुळे त्याचा चेहर गंभीररित्या भाजला गेला. त्याला पुढील उपचारासाठी रूग्णालयात पाठवण्यात आले आहे.

बुधवारी झाबुआ जिल्ह्यातील बाछिखेडा गावातून ही घटना उघडकीस आली. रोहित (वय वर्ष १८) तरूण तोंडात सुतळी बॉम्ब ठेवून फोडत होता. एकामागून एक त्याने सात बॉम्ब तोंडात फोडले. त्याने याचे व्हिडिओही शूट केले. मात्र, आठवा बॉम्ब फोडताना त्याच्याकडून चूक झाली. सुतळी बॉम्ब त्याच्या तोंडातच फुटला. या स्फोटात तरूणाचा चेहरा फाटला.

अपघातानंतर रोहितला तातडीने रूग्णालयात उपचारासाठी दाखल कऱण्यात आले. रूग्णालयाचे डॉक्टर एम.एल चोप्रा यांनी दिलेल्या माहितीनुसार, तरूणाच्या जबड्याला दुखापत झाली आहे. त्याच्या चेहऱ्यावर खोलवर जखम झाली आहे. प्राथमिक उपचारानंतर त्याला दुसऱ्या रूग्णालयात पाठवण्यात आले आहे. या घटनेची माहिती पोलिसांनाही देण्यात आली.

सारंगी पोलीस स्टेशनचे प्रभारी दीपक देवरे यांनी या घटनेला तरूणाचा निष्काळजीपणा असल्याचं सांगितलं. दरम्यान, सोशल मीडियावर दाखवण्यासाठी तरूणांनी धोकादायक पाऊल उचलू नये, असे आवाहन पोलिसांनी केले. दरम्यान, या घटनेनंतर परिसरात खळबळ उडाली आहे.