'ना मोहोळांवर - ना भाजपवर माझा राग, पण...'; केंद्रीय मंत्र्यांविरोधात रान उठवणारे रवींद्र धंगेकर नेमकं काय म्हणाले?

पुण्यात सध्या भाजपविरूद्ध एकनाथ शिंदेंची शिवसेना, अशा २ पक्षांच्या वेगवेगळ्या भूमिका पाहायला मिळत आहे. शिवसेनेचे नेते रवींद्र धंगेकर गेल्या काही दिवसांपासून केंद्रीय मंत्री मुरलीधर मोहोळ यांना टार्गेट करत आहेत. हा वाद खरंतर जैन बोर्डिंग जमिनीच्या प्रकरणामुळे उभा राहिला आहे.

यासंदर्भात पुण्यातील भाजप नेत्यांनी मुख्यमंत्री देवेंद्र फडणवीस यांच्याकडे तक्रार केली आहे. या पार्श्वभूमीवर रवींद्र धंगेकर यांनी आपली भूमीका स्पष्ट केली आहे. त्यांनी सांगितलं की, "माझा राग मुरलीधर मोहोळ यांच्यावर किंवा भाजपवर नाही. माझा राग विकृतींवर आहे", असं धंगेकर म्हणाले.

जैन बोर्डिंग जमीन प्रकरणाबाबत रवींद्र धंगेकर म्हणाले, 'पुणेकरांच्या हितासाठी जे आहे, ते मी बोलणारच. मी पक्षावर बोलत नाही मी विकृती वर बोलतोय. मुख्यमंत्री देवेंद्र फडणवीस यांना विनंती आहे की, ज्यांनी कुणी जैन बोर्डिंग जमीन हडप करण्याचा प्रयत्न केलाय, त्यांची सखोल चौकशी करावी', अशी मागणी त्यांनी मुख्यमंत्र्यांकडे केली.

'मी टीकेला घाबरत नाही, महावीर देवाचे मंदिर गहाण ठेवलं तर मी बोलायचं नाही का?', असा सवालही धंगेकर यांनी उपस्थित केला. 'माझा मोहोळ यांच्यावर राग नाही, विकृतीवर राग आहे. महापालिकेत, शासनाच्या टेंडरमध्ये सगळीकडे विकृती, सगळीकडे लुटायचं आणि खायचं', असंही धंगेकर म्हणाले. 'जैन बोर्डिंगमध्ये सगळ्या कंपनी मॅनेज झाल्या आहे. रेशन काढायला साधारण १५ दिवस लागतात. इकडे कर्ज वगैरे काढून झाले', असा दावा धंगेकर यांनी केला.

'मी चुकीचं असेल तर, भाजपच्या कार्यकर्त्यांनी येऊन मला सांगावं. मी चुकतोय. माझी इच्छा आहे की त्यांनी माझी तक्रार करावी. पण भाजपच्या विकृतींनी तक्रार करू नये', असं रवींद्र धंगेकर म्हणाले. 'मला भाजपच्या आणि इतर पक्षाच्या खासदार नेत्यांनी फोन केला तर मी त्यांना नक्की भेटायला जाईन. अनिल शिरोळे यांनी बोलावलं तर मी नक्की जाईन. पण मला अड्डा, गुथ्थावाल्यांनी बोलावलं तर मी जाणार नाही', असंही धंगेकर म्हणाले.