मध्य प्रदेशातील इंदूरमधून धक्कादायक बातमी समोर येत आहे. घरात आग लागल्यामुळे शोरूम मालक प्रवेश अग्रवाल यांचा मृत्यू झाला. इंदूरमधील तीन मजली इमारतीला आग लागली होती. या आगीत अग्रवाल यांचा गुदमरून मृत्यू झाला. आग लागली तेव्हा कुटुंब घरात झोपले होते. या घटनेची माहिती मिळताच परिसरात खळबळ उडाली. काँग्रेसचे ज्येष्ठ नेते कमलनाथ आणि इतर पक्षाच्या नेत्यांनी निधनाबद्दल शोक व्यक्त केला.

ही घटना गुरूवारी पहाटे पाच वाजताच्या सुमारास लासुडिया पोलीस स्टेशन परिसरात घडली. पोलीस निरीक्षक नीतू सिंग यांनी सांगितले की, 'इमारतीच्या तळ मजल्यावर कार कंपनी मालकाचं शोरूम आहे. तर, तिसऱ्या मजल्यावर प्रवेश अग्रवाल यांचे शोरूम आहे. अग्रवाल यांचं तिथेच पेंटहाऊस आहे. घरातील मंदिरात दिवा तेवत होता. या दिव्यामुळे घरात आग लागली. हळूहळू संपूर्ण घरात धूर पसरला'.

'आग लागली तेव्हा घरात पत्नी आणि दोन अल्पवयीन मुली होत्या. या घटनेत शो रूम मालकाचा दुर्देवी मृत्यू झाला', असं पोलिसांनी सांगितलं. पोलिसांनी मृतदेह ताब्यात घेऊन पोस्टमॉर्टमसाठी रूग्णालयात पाठवलं. तर, व्यावसायिकाच्या लेकीवर खासगी रूग्णालयात उपचार सुरू आहेत.

आग लागली असल्याची माहिती मिळताच अग्निशमन दलाने घटनास्थळी धाव घेतली. तसेच आग आटोक्यात आणण्याचा प्रयत्न केला. घरात प्रचंड धूर झाल्यामुळे प्रवेश अग्रवाल यांचा गुदमरून मृत्यू झाला. मिळालेल्या माहितीनुसार, अग्रवाल हे काँग्रेस पक्षाशी संबंधित होते. अग्रवाल यांच्या मृत्यूनंतर काँग्रेसचे ज्येष्ठ नेते कमलनाथ आणि इतर पक्षाच्या नेत्यांनी निधनाबद्दल शोक व्यक्त केला आहे.