Vijay Shah News : कर्नल सोफिया कुरैशी यांच्यावर वादग्रस्त वक्तव्य करणारे भाजप नेते, मंत्री विजय शहा अडचणीत सापडले आहेत. वादग्रस्त वक्तव्य केल्याप्रकरणी मध्य प्रदेशचे भाजपचे मंत्री विजय शहा यांच्या विरोधात हायकोर्टाने आक्रमक भूमिका घेतली आहे. हायकोर्टाने मध्य प्रदेशच्या महासंचलाकाला मंत्री विजय शहा यांच्याविरोधात ४ तासांत एफआयआर नोंदवण्याचे आदेश दिले आहेत. या प्रकरणाची सुनावणी गुरुवारी सकाळी होणार आहे.

हायकोर्टाचे न्यायाधीश अतुल श्रीधरण आणि अनुराधा शुक्ला यांच्या खंडपीठाने संपूर्ण प्रकरण जाणून घेतलं. त्यानंतर मध्य प्रदेशच्या महासंचालकांना मंत्री विजय शहा यांचया विरोधात गुन्हा दाखल करण्याचे आदेश दिले आहेत. कोर्टाने मंत्री विजय शहा यांच्या विरोधात एफआयआर नोंदवण्याचे आदेश दिले आहेत. कोर्टाने राज्याचे महाधिवक्ता प्रशांत सिंह यांनाही कारवाईचे कडक निर्देश दिले होते.

कर्नल सोफिया कुरैशी यांच्यावर केलेल्या वक्तव्याप्रकरणी मध्य प्रदेशच्या काँग्रेसने भाजप मंत्री विजय शहा यांच्या विरोधात आक्रमक भूमिका घेत कारवाईसाठी आंदोलन केलं होतं. काँग्रेस नेते जीतू पटवारी यांनी बुधवारी भोपाळच्या श्यामला हिल्स ठाण्यात पोहोचले होते. त्यांनी एडीसीपी शालिनी दीक्षित यांच्याशी चर्चा केली. या चर्चेनंतर पोलिसांनी जीतू पटवारी यांच्या तक्रारीवरून एफआयआर नोंदवला आहे.

मध्य प्रदेशमधील भाजप सरकामधील कॅबिनेट मंत्री विजय शहा यांनी एका सभेत कर्नल सोफिया कुरैशींवर वादग्रस्त वक्तव्य केलं होतं. विजय शहा यांनी कर्नल सोफिया यांचं नाव न घेता पाकिस्तानी दहशतवाद्यांबाबत वक्तव्य केलं होतं. 'आम्ही त्यांची बहीण पाठवून त्यांच्यावर कारवाई केली, असं वक्तव्य मंत्री विजय शहा यांनी केलं होतं. या वक्तव्यानंतर विजय शहा यांच्या अडचणीत भर पडली आहे. विजय शहा भाजपचे वरिष्ठ नेते आहेत. ते आठ वेळा विधानसभा निवडणूक जिंकले आहेत.