Beed: बीडमध्ये गॅस टंचाईत सिलिंडरचा काळाबाजार, सिलिंडरने भरलेले ३ ट्रक लपवून ठेवले

आखाती देशांमध्ये सुरू असलेल्या युद्धाचा फटका सर्वसामान्य नागरिकांना बसण्यास सुरूवात झाली आहे. या युद्धामुळे राज्यातील अनेक ठिकाणी गॅस सिलिंडरचा तुटवडा निर्माण झाला आहे. गॅस सिलिंडर मिळत नसल्यामुळे अनेक हॉटेल, रेस्टॉरंट्स बंद होऊ लागले आहेत. बीडमध्ये गॅस सिलिंडर मिळावा यासाठी गॅस एजन्सीच्या बाहेर मोठ्या रांगा लागल्या आहेत. तर दुसरीकडे गॅस सिलिंडरने भरलेले ३ ट्रक एका पंपाच्या बाजूला उभे केले आहेत. हा संपूर्ण प्रकार बीडच्या पाटोदा तालुक्यातील आहे. साईलीला नावाच्या एजन्सीने सिलिंडरने भरलेले ३ ट्रक एका साईडला लावले आहेत. यामुळे ग्राहकांना वेठीस धरणे त्याचबरोबर मूळ किंमत सोडून जास्त पैसे आकारणे हा धंदा सध्या बीडमध्ये सुरू झाला आहे. सिलिंडर स्टॉक करून ठेवून त्यानंतर विकणे हा प्रकार बीडमध्ये होताना दिसत आहे. त्यामुळे नागरिक संतप्त झाले आहेत.