Pune BJP : पुणे मनपा निवडणुकीआधी भाजपने डाव टाकला, शहरअध्यक्ष निवडला, महापालिकेत पुन्हा कमळ फुलणार?

अक्षय बडवे, पुणे प्रतिनिधी

Dheeraj Ghate Reappointed as BJP Pune President : भारतीय जनता पक्षाने (भाजप) आज राज्यभरातील जिल्हाध्यक्ष आणि शहराध्यक्षांच्या नियुक्त्यांमध्ये बदल केले. यात पुणे शहराच्या शहराध्यक्षपदी धीरज घाटे यांची पुन्हा निवड करण्यात आली आहे. काही दिवसांपूर्वी प्रदेश नेत्यांनी बंद लिफाफ्यातून शहराध्यक्षपदासाठी नावे मागवली होती, ज्यात घाटे यांचे नाव आघाडीवर होते.

लोकसभा आणि विधानसभा निवडणुकांदरम्यान घाटे यांनी शहराध्यक्षपद सांभाळले असून, दोन्ही निवडणुकांमध्ये भाजपला पुण्यात घवघवीत यश मिळाले. त्यांच्या कार्यक्षम नेतृत्वामुळे पक्षात त्यांच्याबद्दल विश्वास निर्माण झाला आहे. यामुळे, "नवा चेहरा की जुनाच विश्वास?" अशी चर्चा असताना, प्रदेश नेतृत्वाने घाटे यांच्यावरच पुन्हा जबाबदारी सोपवली. "जिथे विश्वास, तिथे घाटे" अशी म्हण पक्ष कार्यकर्त्यांमध्ये रूढ झाली आहे. घाटे यांच्या नेतृत्वाखाली पुणे शहरात भाजप आणखी मजबूत होईल, अशी अपेक्षा व्यक्त होत आहे.

नेमके कोण आहेत धीरज घाटे

पुण्याच्या सामाजिक क्षेत्रात गेल्या 32 वर्षांपासून धीरजगाटे सक्रिय आहेत. पुणे महापालिकेच्या नगरसेवक पदावर असताना धीरज घाटे यांनी महापालिकेचे सभागृह नेतेपद सुद्धा भूषवला आहे. साने गुरुजी मंडळ व हिंदू गर्जना प्रतिष्ठानच्या माध्यमातून धीरज घाटे यांनी राजकीय तसेच अनेक सामाजिक उपक्रम राबवले आहेत. शहरातील अनेकांसोबत दांडगा संपर्क असलेली धीरज घाटे हे स्वतः राष्ट्रीय स्वयंसेवक संघाच्या परिवारामधून आलेले आहेत. लोकसभा आणि विधानसभा निवडणुकीत पुणे शहराच्या भाजपाचे संघटन मजबूत करण्यासाठी घाटे यांचा वाटा मोठा आहे.

पुणे महापालिकेवर कमळ बहरणार, भाजप पदाधिकाऱ्यांच्या प्रतिक्रिया

भाजपकडून आज राज्यातील जिल्हाध्यक्ष आणि शहर अध्यक्ष यांची नियुक्ती करण्यात आली. यामध्ये पुणे शहरात बदल न करता धीरज घाटे यांनाच पुन्हा शहराध्यक्ष पदाची जबाबदारी देण्यात आली आहे. आगामी काळात भाजपचे पक्ष संघटन आणि सदस्यता नोंदणी यावर भर दिला जाईल आणि पुणे महापालिकेच्या निवडणुकीत मोठ्या मताने आम्ही जिंकून येऊ असा विश्वास घाटे यांनी व्यक्त केला. तसंच विधानसभा आणि लोकसभा निवडणुकीत घवघवीत यशानंतर पुणे महापालिकेवर पुन्हा एकदा कमळ च बहरेल अशी प्रतिक्रिया भाजप पदाधिकाऱ्यांनी दिली आहे. घाटे यांच्या नियुक्तीनंतर कुटुंबाकडून त्यांचे औक्षण करण्यात आले तसेच भाजपा कार्यकर्त्यांनी त्यांना पेढे भरून त्यांचं अभिनंदन केलं.