YouTuber Jyoti Malhotra: हरियाणातील युट्यूबर ज्योती मल्होत्राला पाकिस्तानसाठी हेरगिरी केल्याच्या आरोपाखाली अटक करण्यात आली आहे. या प्रकरणात पंजाबमधील मालेरकोटला आणि हरियाणा येथून ६ पाकिस्तानी हेरांना अटक करण्यात आली आहे. आता या प्रकरणात एक मोठा खुलासा झाला आहे.

पहलगाम हल्ला होण्याच्या तीन महिन्यांपूर्वी ज्योती मल्होत्रा श्रीनगरला ट्रिपवर गेली होती. तेव्हा तिने पहलगामला देखील भेट दिली होती. जानेवारीमध्ये श्रीनगर ट्रीपनंतर ज्योती मार्च महिन्यात पाकिस्तानला गेली. ज्योतीच्या इंस्टाग्राम अकाउंटवर शोध घेतल्यानंतर ही माहिती समोर आली. ज्योती पाकिस्तान उच्चायुक्तालयात काम करणाऱ्या दानिश नावाच्या अधिकाऱ्याच्या संपर्कात होती असा आरोप केला जात आहे. याच अधिकाऱ्याने ज्योतीला पाकिस्तानमध्ये पाठवले होते.

२०२३ मध्ये पाकिस्तान उच्चायुक्तालयात गेली असल्याचे ज्योती मल्होत्राने पोलीस चौकशीदरम्यान कबूल केले. पाकिस्तानला जाण्यासाठी ज्योतीला व्हिसाची गरज होती. तेव्हा तिची भेट अहसान-उर-रहीम उर्फ ​​दानिशशी झाली. यादरम्यान तिने दानिशचा फोन नंबर घेतला, त्यांचा संवाद सुरु झाला. त्यानंतर ज्योती दोनदा पाकिस्तानला गेली. दानिशच्या सल्ल्यानुसार तिथे अली अहवानला भेटली. त्याने ज्योतीची पाकिस्तानमध्ये राहण्याची आणि प्रवासाची व्यवस्था केली.

अली अहवानने ज्योतीची ओळख पाकिस्तानी सुरक्षा आणि गुप्तचर अधिकाऱ्यांशी करवून दिली. याच दरम्यान ज्योती शाकीर आणि राणा शाहबाज या दोन लोकांना भेटली. संशय येऊ नये म्हणून तिने शाकीरचा नंबर फोनमध्ये जाट रंधावा म्हणून सेव्ह केला. भारतात परतल्यानंतर ती स्नॅपचॅट, व्हॉट्सअॅप आणि टेलिग्राम सारख्या सोशल मीडिया प्लॅटफॉर्मद्वारे या लोकांशी संपर्कात होती. ज्योती मल्होत्रा पाकिस्तानी गुप्तचर संस्थेच्या संपर्कात असल्याचे आढळून आले आहे.

पोलिसांनी शनिवारी (१७ मे) ज्योतीला न्यायालयात हजर केले. तिला पाच दिवसांच्या रिमांडवर ठेवण्यात आले आहे. १५ मे रोजी डीएसपी जितेंद्र कुमार यांच्या नेतृत्वाखालील पथकाने ज्योतीला तिच्या घरातून ताब्यात घेतले. तिच्या विरुद्ध हिसार सिव्हिल लाईन्स पोलीस ठाण्यात गुन्हा दाखल करण्यात आला आहे. सेंट्रल एजन्सी ज्योतीची चौकशी करत आहेत.