झारखंडमधील रांची मधून धक्कादायक प्रकरण उघडकीस आले आहे. २९ वर्षीय व्यक्ती संजय लोहराची हत्या करण्यात आली. धक्कादायक म्हणजे हे कृत्य त्याच्याच पत्नीने आणि तिच्या प्रियकराने केल्याचे पोलीस तपासात समोर आले आहे. पोलिसांनी या प्रकरणात संजय यांची पत्नी सुबोधिनी देवी आणि तिचा प्रियकर रमन सेठ यांना अटक केली आहे. या घटनेने परिसरात खळबळ उडाली आहे.

मिळालेल्या माहितीनुसार, १९ जून रोजी रांचीजवळील जंगल परिसरात एका अज्ञात व्यक्तीचे अर्धवट जळालेले शरीर आढळून आले होते. मात्र, मृतदेहाचे शीर गायब असल्यामुळे पोलिसांसमोर मृत व्यक्तीची ओळख पटवण्याचे मोठे आव्हान उभे राहिले होते. या प्रकरणाचा तपास सुरू असतानाच तब्बल १७ दिवसांनंतर पोलिसांना त्याच जंगल परिसरातून धडापासून वेगळे केलेले शीर सापडले. त्यानंतर मृत व्यक्तीची ओळख संजय लोहरा अशी पटली.

तपासादरम्यान समोर आलेल्या माहितीनुसार, सुबोधिनी देवीचे रमन सेठ याच्याशी प्रेमसंबंध होते. तिला रमनसोबत लग्न करायचे असल्याने दोघांनी मिळून संजय लोहराची हत्या करण्याचा कट रचला. पोलिस चौकशीत सुबोधिनीने या कटाची कबुली दिली आहे. हत्या केल्यानंतर आरोपींनी पुरावे नष्ट करण्याचा प्रयत्न केला. रमन सेठने आपल्या आणखी दोन साथीदारांच्या मदतीने मृतदेहाचे शीर धडापासून वेगळे केल्याचे तपासात समोर आले आहे. त्यानंतर मृतदेह जंगलात नेऊन त्याची विल्हेवाट लावण्याचा प्रयत्न करण्यात आला. आरोपींनी ओळख लपवण्यासाठी शीर वेगळे करून जंगलात पुरल्याचेही पोलिस तपासात निष्पन्न झाले आहे.

या प्रकरणातील आणखी दोन आरोपी अद्याप फरार असून त्यांचा शोध घेण्यासाठी पोलिसांकडून विविध ठिकाणी छापेमारी सुरू आहे. तसेच मृतदेह नेण्यासाठी आणि पुरावे नष्ट करण्यासाठी वापरण्यात आलेली एक कारही पोलिसांनी जप्त केली आहे. या प्रकरणाबाबत एका वरिष्ठ पोलिस अधिकाऱ्याने सांगितले की, सध्या या प्रकरणाचा पुढील तपास सुरू असून फरार आरोपींचा शोध वेगाने घेतला जात आहे.