इराण अमेरिका-इस्रायल यांच्यातील सुरू असलेल्या युद्धाला आता तिसरा आठवडा सुरू झाला असून, ते संपण्याची कोणतीही चिन्हे दिसत नाहीत. इराण युद्धाची अनेक भीषण छायाचित्रे सोशल मीडियावर समोर येत आहेत. या संघर्षादरम्यान मध्य-पूर्वेकडील देशांमधील इंधन प्रकल्पांवर झालेल्या हल्ल्यांमुळे आता जागतिक ऊर्जा संकटाची भीती निर्माण झाली आहे. इराण युद्धाचे परिणाम भारतातही जाणवत आहेत. एलपीजीच्या संकटानंतर आता पेट्रोल आणि डिझेलच्या दरातही वाढ झाली आहे.

औद्योगिक डिझेलच्या दरात मोठी वाढ

प्रीमियम पेट्रोलच्या दरात प्रति लिटर ₹2 पेक्षा जास्त दरवाढ केल्यानंतर, इंडियन ऑइल कॉर्पोरेशनने (IOC) आता औद्योगिक डिझेलच्या दरात लक्षणीय वाढ केली आहे. प्रति लिटर ₹22 च्या या प्रचंड दरवाढीमुळे देशाच्या औद्योगिक क्षेत्राला मोठा फटका बसला आहे. मिळालेल्या माहितीनुसार, औद्योगिक डिझेलच्या किमती प्रति लिटर ₹87.67 वरून ₹109.59 पर्यंत वाढून विक्रमी पातळीवर पोहोचल्या आहेत. उत्पादन, लॉजिस्टिक्स आणि पायाभूत सुविधा यांसारखी क्षेत्रे, जिथे डिझेलचा मोठ्या प्रमाणात वापर होतो, त्यांना या दरवाढीचा सर्वाधिक फटका बसेल.

औद्योगिक डिझेलच्या दरवाढीचा परिणाम दैनंदिन वापराच्या वस्तूंवरही होईल, असे तज्ज्ञांचे मत आहे. जर इराण युद्ध लवकर संपले नाही, तर भारतातील महागाई सर्वसामान्यांसाठी विनाशकारी ठरू शकते आणि त्याचा भार थेट ग्राहकांवर पडेल. ही दरवाढ अशा वेळी झाली आहे. जेव्हा जागतिक स्तरावर कच्च्या तेलाच्या किमती गगनाला भिडत आहेत. ऊर्जा खर्चाचा हा नवीन भार उद्योगांच्या खिशाला कात्री लावणार.