इंदूरमधील खजराणा परिसरातील खेडी कॉलनीत एक धक्कादायक घटना घडली आहे. एका महिलेच्या घरात आक्षेपार्ह स्थितीत आढळलेल्या सहाय्यक पोलीस उपनिरीक्षकास स्थानिक नागरिकांनी खांबाला बांधून बेदम मारहाण केली. या घटनेचा व्हिडिओ सध्या सोशल मीडियावर प्रचंड व्हायरल होत आहे, ज्यामुळे परिसरात मोठी खळबळ उडाली आहे.

मिळालेल्या माहितीनुसार, ही धक्कादायक घटना सकाळी ६ वाजण्याच्या सुमारास घडली. एएसआय सुरेश बनकर हे गेल्या २ महिन्यांपासून महिलेच्या संपर्कात होते. महिलेचा तिच्या पतीशी वाद सुरू होता. त्यामुळे ती आपल्या पतीपासून विभक्त राहत होती. याच दरम्यान, संबंधित महिलेची पोलिसाशी ओळख झाली. ते वारंवार महिलेच्या घरी जात होते.

गुरूवारी सुरेश महिलेच्या घरी होते. तेव्हा स्थानिकांनी त्यांना आक्षेपार्ह स्थितीत पाहिले. स्थानिकांचा आरोप आहे की सुरेश त्यावेळेस दारू पिऊन शिवीगाळ करत होते. त्यांना आक्षेपार्ह स्थितीत पाहून राग अनावर झाला. त्यांनी थेट त्यांना खांबाला बांधून काठीनं मारहाण केली. याचा व्हिडिओही सोशल मीडियात व्हायरल होत आहे.

घटनेची माहिती मिळताच खजराणा पोलिसांनी घटनास्थळी पोहोचले. त्यांनी एएसआय यांची जमावापासून सुटका केली. यावेळी पोलिसांनी काही महिलांना ताब्यात घेतलं आहे. वरिष्ठ अधिकाऱ्यांच्या सूचनेनुसार, सुरेश यांची वैद्यकीय तपासणी करण्यात आली. प्राथमिक तपासानुसार, एफआयआर दाखल करण्यात आला आहे. सध्या पोलिसांकडून अधिक तपास सुरू आहे.