Shocking News : अमेरिकेत एक धक्कादायक प्रकार घडला आहे. अमेरिकेतील डलास येथे एका भारतीय विद्यार्थ्याची निर्घृणपणे गोळ्या घालून हत्या करण्यात आली आहे. हा विद्यार्थी बीडीएसचे शिक्षण पूर्ण केल्यानंतर उच्च शिक्षणासाठी अमेरिकेत गेला होता. आर्थिक स्थिती सांभाळण्यासाठी तो पेट्रोल पंपावर काम करत असे. या घटनेची सध्या सोशल मीडियावर मोठी चर्चा पाहायला मिळते आहे.

मिळालेल्या माहितीनुसार, मृत्यू झालेल्या विद्यार्थ्याचे नाव पोल चंद्रशेखर असे होते. तो तेलंगणातील हैदराबादमधील एलबी नगर येथील रहिवासी आहे.२५ वर्षीय चंद्रशेखरने हैदराबादमधील एका महाविद्यालयातून बॅचलर ऑफ डेंटल सर्जरी (बीडीएस) पदवी मिळवली होती. पुढील शिक्षण घेण्यासाठी तो अमेरिकेतील डलास येथे गेला होता. तो एका पेट्रोल पंपावर पार्ट टाइम काम देखील करत असे.

स्थानिक सूत्रांनुसार, चंद्रशेखर ज्या पेट्रोल पंपावर काम करत होता, त्या पंपावर काही अज्ञात दरोडेखोर घुसले. दरोडा टाकण्याच्या उद्देशाने त्यांनी गोळीबार केला. या गोळीबारात चंद्रशेखरच्या छातीत दोन गोळ्या लागल्या. रुग्णालयात पोहोचण्यापूर्वीच त्याचा मृत्यू झाला. या प्रकरणी स्थानिक पोलिसांनी एका ताब्यात घेतले असून तपास सुरु केला आहे.

बीआरएसचे आमदार हरीश राव यांनी चंद्रशेखरच्या हैदराबादमधील घराला भेट दिली. त्यांनी तेलंगणा सरकारला परराष्ट्र मंत्रालय आणि अमेरिकन दूतावासाशी समन्वय साधून मृतदेह लवकरात लवकर मायदेशी परत आणण्याचे आवाहन केले. मुलाची निर्घृणपणे हत्या केल्याने चंद्रशेखर यांचे आईवडील शोकात बुडाले आहेत.