पाकिस्तानच्या दहशतवाद्यांनी भारताच्या पहलगाममध्ये हल्ला करत २८ निष्पाप पर्यटकांची हत्या केली होती. या हल्ल्यानंतर १५ व्या दिवशी भारताने बदला घेतला. ऑपरेशन सिंदूरद्वारे एअर स्ट्राईक करत भारताने पाकिस्तानमधील दहशतवाद्यांचे ९ तळ उद्ध्वस्त केले. या हल्ल्यामध्ये पाकिस्तानचे अनेक दहशतवादी ठार झाले. या दहशतवाद्यांची यादी समोर आली आहे. भारताने पाकिस्तानच्या कोणकोणत्या दहशतवाद्यांचा खात्मा केला हे आपण पाहणार आहोत...

७ मे रोजी भारताने पाकिस्तानमध्ये ऑपरेशन सिंदूरद्वारे एअर स्ट्राईक केला होता. या एअर स्ट्राईकमध्ये भारताने पाकिस्तानमधील दहशतवाद्यांचे ९ तळ उद्ध्वस्त केले होते. या हल्ल्यात १०० पेक्षा अधिक दहशतवाद्यांचा खात्मा करण्यात आला होता. यामध्ये मोस्ट वॉन्टेड दहशतवादी मसूद अजहरच्या कुटुंबातील १४ जण ठार झाले होते. या हल्ल्यामध्ये ठार झालेल्या दहशतवाद्यांची नावं समोर आली आहेत. या मध्ये लष्कर-ए-तोएबा, जैश-ए-मोहम्मद यासारख्या दहशतवादी संघटनेंच्या कमांडर आणि प्रमुखांचा समावेश होता.

ठार झालेल्या दहशतवाद्यांची नावं -

१) मुदस्सर खादियान खास उर्फ ​​मुदस्सर उर्फ ​​अबू जुंदाल, लष्कर-ए-तोएबा संघटना- त्याची अंत्ययात्रा एका सरकारी शाळेत पार पडली. ज्याचे नेतृत्व जमात-ए-उद-दावाचा हाफिज अब्दुल रौफ (जागतिक दहशतवादी म्हणून घोषित) करत होता.

२) हाफिज मोहम्मद जमील, जैश-ए-मोहम्मद संघटना - तो मौलाना मसूद अझहरचा मोठा मेहुणा आहे.

३) मोहम्मद युसूफ अझहर उर्फ ​​उस्ताद जी उर्फ ​​मोहम्मद सलीम उर्फ ​​घोसीसाहब, जैश-ए-मोहम्मद संघटना - तो मौलाना मसूद अझहरचा मेहुणा होता.

४) खालिद उर्फ ​​अबू आकाशा, लष्कर-ए-तोएबा - तो जम्मू आणि काश्मीरमधील अनेक दहशतवादी हल्ल्यांमध्ये सहभागी होता आणि अफगाणिस्तानातून शस्त्रास्त्रांची तस्करी करत होता. त्याचे अंत्यसंस्कार फैसलाबाद येथे झाले आणि यावेळी वरिष्ठ पाकिस्तानी लष्करी अधिकारी आणि फैसलाबादचे उपायुक्त उपस्थित होते.

५) मोहम्मद हसन खान, जैश-ए-मोहम्मद संघटना - तो पाकव्याप्त काश्मीरमधील जैशचे ऑपरेशनल कमांडर मुफ्ती असगर खान काश्मिरीचा मुलगा होता. जम्मू आणि काश्मीरमधील दहशतवादी हल्ल्यांचे समन्वय साधण्यात त्याने महत्त्वाची भूमिका बजावली.