हैदराबादमधील मेदचल जिल्ह्यातून एक अत्यंत धक्कादायक आणि मन सुन्न करणारी घटना समोर आली आहे. लग्नास नकार दिल्याने एका तरुणाने जबरदस्तीने HIV संक्रमित इंजेक्शन टोचल्यामुळे, एका २४ वर्षीय तरुणीने राहत्या घरी गळफास घेऊन आत्महत्या केली आहे.

मृत तरुणीचे नाव रमणी असून ती अन्नोजिगुडा येथील राजीव गृहकल्पा कॉलनीमध्ये वास्तव्यास होती. शनिवारी ती आपल्या घरात गळफास घेतलेल्या अवस्थेत आढळली. तिच्या कुटुंबीयांनी तिला तातडीने घाटकेसर येथील शासकीय रुग्णालयात नेले, मात्र डॉक्टरांनी तिला मृत घोषित केले. त्यानंतर तिचा मृतदेह शवविच्छेदनासाठी गांधी रुग्णालयात पाठवण्यात आला आहे.

पोलीस तपासात समोर आले आहे की, या आत्महत्येचे मूळ ११ मार्च रोजी घडलेल्या एका भयानक घटनेत आहे. मनोहर नावाच्या एका तरुणाने रमणीसमोर लग्नाचा प्रस्ताव ठेवला होता. रमणीने लग्नास नकार दिल्यानंतर संतापलेल्या मनोहरने तिला जबरदस्तीने HIV संक्रमित रक्ताचे इंजेक्शन टोचले होते. या प्रकरणाची तक्रार दिल्यानंतर पोलिसांनी मनोहरला अटक केली असून तो सध्या न्यायालयीन कोठडीत आहे.

HIV संसर्गाची भीती, समाजात होणारी बदनामी आणि झालेल्या शारीरिक-मानसिक आघातामुळे ती खचली होती. याच मानसिक दबावातून तिने हे टोकाचे पाऊल उचलल्याचे प्राथमिक तपासात दिसत आहे. पोलीस सध्या या प्रकरणाच्या सर्व बाजूंनी तपास करत आहेत.