भारतात आजही विविध भागातून अंधश्रद्धेच्या घटना समोर येत आहेत. अंधश्रद्धेला बळी पडून भोंदूबाबाला 'मम' म्हणत आहेत. असाच एक प्रकार उत्तर प्रदेशच्या आझमगडमधून समोर येत आहे. एका भोंदूबाबाने तंत्र मंत्रच्या नावाखाली एका महिलेची हत्या केली आहे. भोंदूबाबाने आधी महिलेला शौचालयाचे पाणी पाजले नंतर तिचा गळा आवळून हत्या केली. यामुळे तिचा मृत्यू झाला. तक्रारीवरून पोलिसांनी आरोपीविरोधात गुन्हा दाखल केला आहे.

हा संतापजनक प्रकार कंधारपूर पोलीस स्टेशन परिसरातील पहेलवानपूर गावातून उघडकीस आली आहे. अनुराधा (वय वर्ष ३५) असे मृत महिलेचं नाव आहे. तिचा विवाह १८ वर्षांपूर्वी नैपुरा गावातील रणजीत यादव यांच्याशी झाला होता. ती तिच्या पतीसोबत हरियाणामध्ये राहत होती. काही दिवसांपूर्वी तिच्या पतीने अनुराधाला माहेरी सोडलं. नंतर पुन्हा हरियाणाला परतला.

मुलबाळ होत नसल्यामुळे अनुराधाच्या आईनं तिला एका तांत्रिकाकडे नेलं. तांत्रिकाने अनुराधाला भूताने झपाटले असल्याची माहिती दिली. भूतबाधा दूर करण्यासाठी त्यानं एक लाख रूपयांची मागणी केली. अनुराधाच्या कुटुंबाने त्याला २२ हजार रूपये दिले. तांत्रिकाने रविवारी अनुराधाच्या कुटुंबाला फोन केला. नंतर अनुराधा आपल्या आईला घेऊन तांत्रिकाच्या घरी गेली. चार - पाच साथीदारांसह तांत्रिकाने विधी सुरू केली. त्यांनी अनुराधाचे केस ओढत मारहाण करण्यास सुरूवात केली.

नंतर तांत्रिकाने तिला शौचालय आणि गटारातील घाणेरडे पाणी पाजले. तसेच बराच वेळ तिचा गळा दाबून ठेवला. यामुळे अनुराधाची प्रकृती बिघडली. त्यानंतर तिला तातडीने रूग्णालयात दाखल करण्यात आले. डॉक्टरांनी मात्र तिला मृत घोषित केलं. त्यानंतर तांत्रिक अनुराधाचा मृतदेह घेऊन त्यांच्या घरी गेला आणि मृतदेह मंदिरासमोर ठेवला. त्यानं अनुराधाच्या आईला तिला थोड्या वेळात जाग येईल असं सांगितलं.

नंतर फरार झाला आणि काही दिवसानंतर तो पोलिसांसमोर शरण गेला. घटनेची माहिती मिळताच पोलीस घटनास्थळी पोहोचले. पोलिसांनी मृतदेह शवविच्छेदनासाठी रूग्णालयात पाठवला असून, मृत महिलेच्या वडिलांच्या तक्रारीवरूनपा तांत्रिकाविरोधात गुन्हा दाखल करण्यात आला आहे. या घटनेनंतर परिसरात खळबळ उडाली आहे.