हिमाचल प्रदेशातील शिमला जिल्ह्यातील रामपूरमध्ये भीषण अपघात घडला. तकलेच चौकी हद्दीतील उरमान परिसरात एक पिकअप वाहन खोल दरीत कोसळल्याने त्यामधील सहा जणांचा जागीच मृत्यू झाला. या दुर्घटनेमुळे रस्त्यावर काही काळ वाहतूक ठप्प झाली होती. पोलिसांनी घटनास्थळी पोहचून घटनेची पाहणी केली. दरम्यान पुढील तपास सुरु आहे.

मिळालेल्या माहितीनुसार, पिकअप वाहन रामपूर येथून तकलेच गावाकडे जात होते. तकलेच हे गाव रामपूरपासून सुमारे ३० ते ३५ किलोमीटर अंतरावर डोंगराळ भागात आहे. प्रवासादरम्यान उरमान परिसरात वाहनावरील चालकाचे नियंत्रण सुटल्याने पिकअप रस्त्यावरून घसरून खोल दरीत कोसळले. अपघात इतका भीषण होता की वाहनाचा पूर्ण चक्काचूर झाला आणि त्यामधील सर्व प्रवाशांचा मृत्यू झाला.

अपघाताची माहिती मिळताच पोलीस, स्थानिक प्रशासन आणि बचाव पथके घटनास्थळी दाखल झाली. दरीत उतरून बचावकार्य राबवण्यात आले. मात्र, सर्व प्रवाशांचा मृत्यू झाल्याचे स्पष्ट झाल्यानंतर मृतदेह बाहेर काढून शवविच्छेदनासाठी पाठवण्यात आले. या अपघातात अभिषेक सनी (२३), लायक राम (५६), चालक अशोक जैन (३२), नितीन (२३), आशा कुमारी आणि त्यांचा मुलगा युगल यांचा मृत्यू झाला.

मृतांपैकी आशा कुमारी आणि युगल हे कुल्लू जिल्ह्यातील अनी परिसरातील रहिवासी होते, तर इतर सर्व जण रामपूर परिसरातील विविध गावांतील होते. पोलिसांनी या प्रकरणी गुन्हा दाखल करून अपघाताच्या नेमक्या कारणांचा तपास सुरू केला आहे. वाहनाचा वेग, रस्त्याची स्थिती आणि तांत्रिक बिघाड याची चौकशी केली जात आहे. या दुर्दैवी घटनेमुळे मृतांच्या कुटुंबीयांवर दुःखाचा डोंगर कोसळला असून स्थानिक प्रशासनाने मदतीचे आश्वासन दिले आहे.