गुजरातमधील सुरतमधून एक धक्कादायक बातमी समोर येत आहे. मॉडेलच्या आत्महत्याप्रकरणी पोलिसांनी तिच्या एक्स लिव्ह इन पार्टनरला अटक केली आहे. मॉडेलचा एक्स बॉयफ्रेंड तिला वारंवार ब्लॅकमेल करीत होता. ब्रेकअप झाल्यानंतरही छळ सुरूच होता. एक्स बॉफ्रेंडने तरूणीला डांबून ठेवत बेदम मारहाणही केली होती. याच त्रासाला कंटाळून मॉडेल तरूणीनं आत्महत्या केली. पोलिसांना सुसाईड नोट सापडली असून, त्याच्या आधारे पोलिसांनी तपास करीत आरोपीला बेड्या ठोकल्या आहेत.

सुखप्रीत कौर (वय वर्ष १९) असे मॉडेल तरूणीचं नाव आहे. ती मुळची मध्य प्रदेशातील शिवपुरीतील रहिवासी होती. वर्षभरापूर्वी ती मॉडेलिंगमध्ये करिअर करण्यासाठी सुरतमध्ये आली होती. नंतर तिच्या बॉयफ्रेंडसोबत लिव्ह इनमध्ये राहण्यासाठी दिंडौलीमध्ये आली. मात्र, काही कारणास्तव दोघांमध्ये मतभेद झाले. वाद झाला आणि दोघांनी ब्रेकअप केला.

ब्रेकअप झाल्यानंतर सुखप्रीत कुंभारिया येथील सारथी रेसिडेन्सीमध्ये मैत्रिणींसोबत राहायला गेली. मात्र, ब्रेकअप झाल्यानंतरही एक्स बॉयफ्रेंडकडून छळ सुरूच होता. एक्स बॉयफ्रेंड तिला वारंवार खासगी फोटोंवरून ब्लॅकमेल करीत होता. तसेच मारहाणही केली. मृत्यूच्या आदल्या दिवशी ब्लेडनं तिच्या हातावर वार केले होते.

याच छळाला कंटाळून तिनं चार महिन्यांपूर्वी आत्महत्या केली असल्याची माहिती आहे. यानंतर पोलिसांनी तपासाला सुरूवात केली. पोलीस तपासात त्यांना एक सुसाईड नोट सापडली. हे पत्र तरूणीनं सुरतच्या पोलीस अधीक्षकांना उद्देशून लिहिले होते. त्यात तरूणीनं महेंद्रनं अमानुष वागणुकीबद्दल तसेच धमक्यांबाबत माहिती दिली आहे.

'महेंद्रनं ब्रेकअप झाल्यानंतर त्रास द्यायचे नाही सोडले. शारीरिक इजा तसेच खासगी फोटो व्हायरल करण्याची धमकी दिली. महेंद्रनं डांबून ठेवलं. नंतर बेदम मारहाणही केली. ब्लेडनं हातावर वारही केले', अशी माहिती पत्रातून देण्यात आली. या पत्रातून पोलिसांनी महेंद्र राजपूतविरोधात आत्महत्येस प्रवृत्त केल्याप्रकरणी गुन्हा दाखल केला.

यानंतर महेंद्र फरार झाला. गेल्या चार महिन्यांपासून तो बेपत्ता होता. विविध शहरांमध्ये फिरत होता. मात्र, बुधवारी सुरत पोलिसांनी महेंद्रला शोधून अटक केली आहे. या प्रकरणाचा अधिक तपास पोलिसांकडून सुरू आहे.