ऑपरेशन सिंदूरनंतर दोन मुख्य नावं प्रकाशझोतात आली, भारतीय लष्कराच्या कर्नल सोफिया कुरेशी आणि भारतीय वायुसेनेच्या विंग कमांडर व्योमिका सिंग. या दोन्ही महिलांमुळे ऑपरेशन सिंदूर फत्ते झालं आणि पाकड्यांना सडेतोड उत्तर देण्यात आलं. व्योमिका सिंग सध्या चर्चेत आहे. त्यांचं आदर्श डोळ्यांसमोर ठेवून अनेकांनी आता वायुसेनेत पायलट बनण्याची इच्छा व्यक्त केली. पण व्योमिका सिंह यांचा संघर्षांचा प्रवास सोपा नव्हता. आई वडिलांकडून विरोध ते यशस्वी विंग कमांडर, त्यांचा प्रवास नेमका कसा होता? जाणून घेऊयात.

हवाई दलाच्या विंग कमांडर व्योमिका सिंग यांचा जन्म उत्तर प्रदेशच्या लखनऊ येथे झाला. व्योमिक सिंगचे वडील भारतीय हवाई दलात पायलट होते. त्यांचे संपूर्ण कुटुंब देशसेवेत कार्यरत आहेत. व्योमिका सिंग यांनी केलेल्या कार्याबद्दल त्यांच्या आई वडिलांना कौतुक आहे.

आज तक या वृत्तसंस्थेला दिलेल्या मुलाखतीत, व्योमिका सिंह यांचे वडील सांगतात, 'जेव्हा माझी लेक दहावीत होती, तेव्हापासून तिने पायलट बनण्याचं स्वप्न उरी बाळगलं होतं. सुरूवातीला आम्ही आमच्या मुलीला अडवलं. मात्र, जिद्दीने तिने आपलं स्वप्न पूर्ण केलं आणि ती आता ते स्वप्न जगत आहे'.

आईच्या आठवणींमध्ये व्योमिका लहानपणापासूनच वेगळी होती. 'ती नेहमी खेळ, स्पर्धा यात भाग घ्यायची. एकदा तर खेळात भाग घेऊन मुलांना चितपट करत तिने २०,८०० रुपयांचं बक्षीस मिळवलं होतं,' असं आईनं सांगितलं.

व्योमिकाचे वडील सांगतात, लहानपणी व्योमिकाला शिट्टी वाजवायची सवय होती. तिला एका महिलेनं अडवलं. मुलींनी शिट्टी वाजवू नये, असं तिला सांगण्यात आलं, मात्र, तेव्हा तिने मुलगा - मुलगीमध्ये का फरक करता? मुलगा - मुलगी एकसमान असं तिनं उत्तर दिलं होतं. तेव्हा आम्हाला तिचा अभिमान वाटत होता, असं व्योमिकाच्या वडिलांनी सांगितलं.

हवाई दलात भरती होण्याचा निर्णय घेतल्यानंतर व्योमिकानं सर्वात आधी वडिलांना सांगितलं. आईला तिने आधी काहीच सांगितलं नाही. अखेर तिची निवड झाली, तेव्हा व्योमिकानं ही आनंदवार्ता आईला दिली. आनंदाने आईच्या डोळ्यांतून अश्रू वाहू लागले. आज व्योमिका सिंग अनेकांसाठी प्रेरणास्त्रोत बनली आहे.