छत्तीसगडमधील कथित दारू घोटाळा आणि मनी लॉन्ड्रिंग प्रकरणात माजी मुख्यमंत्री आणि काँग्रेस नेते भूपेश बघेल आणि त्यांच्या मुलाच्या घरावर आणि इतर अनेक ठिकाणी ईडीचे छापे सुरू आहे. या प्रकरणी ईडीने राज्य सरकारी नोकरदार आणि व्यावसायिकांसह अनेकांना अटक केली होती. मिळालेल्या माहितीनुसार, अंमलबजावणी संचालनालयने छत्तीसगडचे माजी मुख्यमंत्री आणि काँग्रेस नेते भुपेश बघेल आणि त्यांचा मुलगा चैतन्य बघेल यांच्या घरी तसेच इतर ठिकाणांवर छापेमारी केली.

मिळालेल्या माहितीनुसार ईडीने पीएमएलए कायदा अंतर्गत दुर्ग जिल्ह्यातील 14 ठिकाणी छापे टाकण्यात आलीत. ज्या ठिकाणी छापेमारी झालीय, ते छत्तीसगडचे माजी मुख्यमंत्री भूपेश बघेल यांच्याशी संबंधित आहेत. बघेल यांचा मुलगा चैतन्य बघेल आणि त्यांच्या निकटवर्तीयांच्या निवासस्थानांचा समावेश आहे. चैतन्य बघेलचा देखील दारू घोटाळ्यात सहभाग असल्याचे ईडीकडून सांगण्यात येत आहे. ज्यामध्ये गुन्ह्यांचे एकूण उत्पन्न अंदाजे 2,161 कोटी रुपये आहे, जे विविध योजनांद्वारे मिळवले गेले आहे.

भूपेश बघेल यांनी सोशल मीडिया प्लॅटफॉर्मवर या प्रकरणी पोस्ट केली आहे, "सात वर्षांपासून सुरू असलेला खोटा खटला न्यायालयात फेटाळलाय. आज सकाळी माजी मुख्यमंत्री, काँग्रेसचे सरचिटणीस भूपेश बघेल यांच्या भिलाई येथील निवासस्थानी ईडीचे पाहुणे दाखल झाले आहेत.या षडयंत्राद्वारे पंजाबमध्ये काँग्रेसला रोखण्याचा कोणी प्रयत्न करत असेल, तर तो गैरसमज आहे.

याप्रकरणी ईडीने याआधीही कारवाई केलीय. मे २०२४ मध्ये तपास यंत्रणेने माजी आयएस अनिल टुटेजा आणि रायपूरचे महापौर एजाज ढेबर यांचे भाऊ अन्वर ढेबर यांच्यासह अनेक आरोपींच्या सुमारे १८ जंगम आणि १६१ स्थावर मालमत्ता तात्पुरत्या स्वरूपात जप्त केल्या होत्या, ज्यांची किंमत २०५.४९ कोटी रुपये होती.