महाराष्ट्रातील मराठवाडा, विदर्भात शनिवारी भूकंपाचे धक्के जाणवल्याची घटना ताजी असताना आता आणखी एका ठिकाणी भूकंप झाला आहे. जम्मू आणि काश्मीरच्या डोडा भागात रविवारी पहाटे 4:32 वाजता भूकंपाचे धक्के जाणवले. डोडा भागातील भूकंपाची तीव्रता रिश्टर स्केल ४.६ इतकी नोंदवली आहे. या भूकंपाच्या धक्क्याने लोक घर सोडून पळाले.

डोडा भागात झालेल्या भूकंपाने काही क्षणासाठी लोकांमध्ये भीतीचं वातावरण निर्माण झालं. काही मिनिटांसाठी लोकांची धावाधाव पाहायला मिळाली. यात आतापर्यंत कोणत्याही प्रकारची जीवितहानी झालेली नाही. जम्मू-काश्मीरसहित म्यानमारमध्येही आज भूकंपाचे धक्के जाणवले. या भूकंपाचे केंद्र जमिनीापासून १४० किलोमीटर खाली असल्याची माहिती नॅशनल सेंटर ऑफ सिसमोलॉजीने दिली. जमिनीपासून कमी खोलीवर होणार्‍या भूकंपामुळे सर्वाधिक नुकसान होते.

जम्मू-काश्मीरमधील डोडा भाग भूकंपाच्या दृष्टीने आधीच संवेदनशील मानला जातो. आधी हे क्षेत्र सिस्मिक झोन IV आणि V मध्ये येते होते. परंतु आता ते क्षेत्र सिस्मिक झोन IV मध्ये ठेवण्यात आलं आहे. यामुळे सरकारने इमारतीच्या दृष्टीने कठोर निर्णय घेण्यात आले आहेत. आता धोकादायक इमारती मजबूत करण्याचे काम सुरू आहेत.

मार्च महिन्यात या क्षेत्रातील भागाची माहिती आणि अभ्यास करण्यासाठी विशेष पथकाची समिती स्थापना केली होती. तसेच एका विशेष एजन्सीला देखील जबाबदारी देण्यात आली आहे. सध्या लोकांना भूकंपाशी संबंधित माहिती नॅशनल सेंटर ऑफ सिसमोलॉजीच्या प्लॅटफॉर्मवर मिळते.

तत्पूर्वी, महाराष्ट्रातील मराठवाडा, विदर्भात काल रिश्टर स्केलवर ४.७ भूकंपाची तीव्रता नोंदवली गेली. या भूकंपाचे धक्के नांदेड, परभणी, हिंगोली जिल्ह्यात जाणवले. या भूकंपात कोणत्याही प्रकारचं नुकसान झाल्याची माहिती हाती आलेली नाही.